ദക്ഷിണേന്ത്യൻ അടുക്കളയിലെ സ്ഥിര സാന്നിധ്യമാണ് ദോശയും ദോശയുടെ വകഭേദങ്ങളും . സാദാ ദോശ , മസാല ദോശ തുടങ്ങി നിരവധി ദോശ ഇനങ്ങളാണ് നമ്മൾ പരീക്ഷിക്കാറുള്ളതും കഴിക്കാറുള്ളതും . നല്ല ചൂട് സാമ്പാറും ചമ്മന്തിക്കുമൊപ്പം ദോശ കഴിക്കുന്നത് ആലോചിക്കുമ്പോൾ തന്നെ വായിൽ വെള്ളമൂറും . അതുപോലെ തന്നെ എളുപ്പത്തിൽ തയ്യാറാക്കാവുന്നതും , പോഷകസമൃദ്ധവും , രുചികരവുമായ ഒരു ദോശ വിഭവമാണ് മുട്ട ചീസ് ദോശ .
മുട്ട ചീസ് ദോശ തയ്യാറാക്കാൻ വേണ്ടുന്ന സാധനങ്ങൾ
1 . ദോശ മാവ്
2 . ഒരു മുട്ട
3 . ഉപ്പ് ആവശ്യത്തിന്
4 . കാൽ ടീസ്പൂൺ മുളക് പൊടി
5 . കാൽ ടീസ്പൂൺ കുരുമുളക് പൊടി
6 . പൊടിപൊടിയായി അരിഞ്ഞ ചീസ്
7 . കാൽ കപ്പ് അരിഞ്ഞ മല്ലിയില
8 . ഒരു ടീസ്പൂൺ അരിഞ്ഞ സ്പ്രിങ് ഒണിയൻ
9 . വെളിച്ചെണ്ണ ആവശ്യത്തിന്
മുട്ട ചീസ് ദോശ തയ്യാറാക്കുന്ന വിധം
1 . മുട്ട പൊട്ടിച്ചു ഒരു ബൗളിലേക്ക് ഒഴിച്ച് നന്നായി ഉടക്കുക
2 . ഇതിലേക്ക് കുരുമുളക് പൊടി , മുളക് പൊടി , ഉപ്പ് എന്നിവ ചേർത്ത് നന്നായി ഇളക്കി മാറ്റി വെക്കുക
3 . ദോശ ചുടുന്ന കല്ല് ചൂടായതിന് ശേഷം ഇതിലേക്ക് ദോശമാവ് ഒഴിച്ച് വട്ടത്തിലാക്കുക
4 . ചെറുതായി വെന്തു വരുമ്പോൾ ഇതിന്റെ മുകളിലേക്ക് അല്പം എണ്ണ തേച്ചു കൊടുക്കുക
5 . എന്നിട്ട് നന്നായി ഉടച്ചു ചേർത്ത് വെച്ചിരിക്കുന്ന മുട്ട ഒഴിച്ച് നന്നായി പരത്തി കൊടുക്കുക
6 . ഇതിന്റെ മുകളിലേക്ക് പൊടിപൊടിയായി അരിഞ്ഞു വെച്ചിരിക്കുന്ന ചീസ് ഇട്ടു കൊടുക്കുക
7 . ഒരു പാത്രം കൊണ്ടടച്ചു വെച്ച് ചെറുതീയിൽ വേവിക്കുക
8 . ദോശ വെന്തു കഴിയുമ്പോൾ ഇതിന്റെ മുകളിലേക്ക് അല്പം മല്ലിയിലയും സ്പ്രിങ് ഒണിയനും തൂവി കൊടുക്കുക
9 . ചൂടോടെ മറ്റൊരു പാത്രത്തിലേക്ക് മാറ്റി , വിളമ്പാവുന്നതാണ്
ദോശയുടെ രണ്ടു പുറവും ആവശ്യത്തിന് വേകുവാൻ വേണ്ടിയാണ് ഒരു പാത്രം കൊണ്ടടച്ചു വെച്ച് ചെറുതീയിൽ വേവിച്ചത് . അതിനാൽ ദോശ മറിച്ചിടേണ്ട ആവശ്യമില്ല .
Comments