ആരോഗ്യത്തിന് വളരെ ഗുണകരമായ ഒന്നാണ് മുളയരി. മുള പൂത്തു കഴിഞ്ഞാല് ഉണ്ടാകുന്ന വിത്തുകളാണിവ. കാഴ്ചയില് ഗോതമ്പിനോട് സാമ്യം തോന്നുന്ന ഒന്നാണിത്. മുളയരി കൊണ്ടുളള പായസം വളരെ രുചികരവും ആരോഗ്യപ്രദവുമാണ്. എങ്ങനെയാണ് ഈ മുളയരി പായസം തയ്യാറാക്കുക എന്ന് നോക്കാം. പായസം തയ്യാറാക്കുന്നതിനായി ആദ്യം തേങ്ങ പിഴിഞ്ഞ് ഒന്നാം പാല്, രണ്ടാം പാല്, മൂന്നാം പാല് എന്നിങ്ങനെ എടുത്ത് മാറ്റിവയ്ക്കുക. ശേഷം ഒരു പാത്രത്തില് ശര്ക്കരയെടുത്ത് നന്നായി അലിയിച്ചു പാവ് തയ്യാറാക്കുക. മുളയരി മൂന്നാം പാല് ചേര്ത്ത് നന്നായി വേവിച്ചെടുക്കുക. പിന്നീട് ഇതിലേക്ക് ശര്ക്കര പാവ് കൂടി ചേര്ക്കുക.
ഇത് നന്നായി തിളച്ചു വരുമ്പോള് ഇതിലേക്ക് രണ്ടാം പാലും ഏലയ്ക്ക പൊടിച്ചതും ചേര്ത്ത് നന്നായി ഇളക്കി കൊടുക്കുക. പിന്നീട് ഇതിലേക്ക് ഒന്നാം പാല് ചേര്ത്ത് തിളക്കുന്നതിനു മുന്പേ തീ ഓഫ് ചെയ്യുക. ശേഷം അണ്ടിപ്പരിപ്പ് മുന്തിരി എന്നിവ നെയ്യില് മൂപ്പിച്ചെടുത്ത് ഇതിലേക്ക് ഇട്ടു കൊടുക്കുക. കൂടെ ഇത്തിരി തേങ്ങാക്കൊത്തും ചേര്ത്ത് കൊടുത്താല് രുചികരമായ മുളയരി പായസം തയ്യാര്. നിരവധി പോഷക ഗുണങ്ങള് അടങ്ങിയിട്ടുളള ഒന്നാണ് മുളയരി. വയനാട് മേഖലകളിലാണ് ഇത് ഏറ്റവും കൂടുതലായി കാണപ്പെടുന്നത്. ആദിവാസികളുടെ ഔഷധമാണിത്.
ഇതില് അടങ്ങിയിരിക്കുന്ന മാംസ്യത്തിന്റെ അളവ് ഗോതമ്പില് ഉളളതിനെക്കാള് കൂടുതലാണ്. വിറ്റാമിന് ബി6, കാല്സ്യം, സള്ഫര്, എന്നിവ ഇതില് അടങ്ങിയിട്ടുണ്ട്. സന്ധിവേദന, നടുവേദന തുടങ്ങിയവയ്ക്ക്നല്ലതാണ് മുളയരി. ഇതില് നാരുകളുടെ അംശം അടങ്ങിയിട്ടില്ലാത്തതിനാല് ദഹനത്തിനും വളരെ നല്ലതാണിത്. ഉദര രോഗങ്ങള്ക്കും ആശ്വാസം നല്കുന്നു. ഗ്യാസ്ട്രബിള് മൂലം ഉണ്ടാകുന്ന വയറു വേദന ശമിക്കാന് മുളയരി വറുത്ത് വെളളം കുടിക്കുന്നത് വളരെ നല്ലതാണ്.
