അബുദാബി: ഐപിഎല്ലില് ഇന്ന് കൊല്ക്കത്ത നൈറ്റ് റൈഡേഴ്സും ചെന്നൈ സൂപ്പര് കിംഗ്സും നേര്ക്കുനേര്. കഴിഞ്ഞ മത്സരത്തിലെ ഉജ്ജ്വല തിരിച്ചുവരവ് നല്കിയ ആത്മവിശ്വാസത്തിലാണ് ചെന്നൈ ഇറങ്ങുന്നതെങ്കില് ഡല്ഹിയോടേറ്റ തോല്വിയുടെ ക്ഷീണം മാറ്റാനാണ് കൊല്ക്കത്തയുടെ പുറപ്പാട്. അബുദാബിയില് ഇന്ത്യന് സമയം രാത്രി 7.30നാണ് മത്സരം.
വയസന് പട എന്ന ചീത്തപ്പേര് തങ്ങള്ക്ക് ചേരുന്നതല്ലെന്ന് വിളിച്ചുപറഞ്ഞ പ്രകടനമാണ് ചെന്നൈ കഴിഞ്ഞ മത്സരത്തില് പുറത്തെടുത്തത്. കരുത്തരായ കിംഗ്സ് ഇലവന് പഞ്ചാബ് ഉയര്ത്തിയ 179 റണ്സ് വിജയലക്ഷ്യം ഒറ്റ വിക്കറ്റ് പോലും നഷ്ടപ്പെടാതെ 14 പന്തുകള് ബാക്കി നിര്ത്തിയാണ് ചെന്നൈ മറികടന്നത്. തുടര്ച്ചയായി പരാജയപ്പെട്ടെങ്കിലും വീണ്ടും ലഭിച്ച അവസരം ഷെയ്ന് വാട്സണ് ശരിക്കും മുതലാക്കി. ഫാഫ് ഡുപ്ലസിയുടെ സ്ഥിരതയാര്ന്ന പ്രകടനവും ചെന്നൈയ്ക്ക് പ്രതീക്ഷ നല്കുന്നു.
മറുഭാഗത്ത് കൊല്ക്കത്ത ക്യാമ്പില് കാര്യങ്ങള് അത്ര ശുഭകരമല്ല. നായക സ്ഥാനത്ത് നിന്ന് ദിനേഷ് കാര്ത്തിക്കിനെ മാറ്റണമെന്ന ആവശ്യം ഇതിനോടകം തന്നെ ഉയര്ന്നു കഴിഞ്ഞു. ഇംഗ്ലണ്ടിന് ലോകകിരീടം നേടിക്കൊടുത്ത ഇയന് മോര്ഗനെ നായകനാക്കണമെന്ന് ആവശ്യപ്പെട്ട് ക്രിക്കറ്റ് വിദഗ്ധര് രംഗത്തെത്തിയിരുന്നു. മോര്ഗനും ശുഭ്മാന് ഗില്ലും നിതീഷ് റാണയും മാത്രമാണ് ഭേദപ്പെട്ട പ്രകടനം പുറത്തെടുത്തിട്ടുള്ളത്. ദിനേഷ് കാര്ത്തിക്കും ആന്ദ്രെ റസലും സുനില് നരൈനും ഇനിയും ഫോമിലേയ്ക്ക് ഉയര്ന്നിട്ടില്ല.
