‘അയ്യോ, എന്റെ മുടിയൊക്കെ നരച്ചേ’ എന്ന് വിഷമിക്കുന്ന യുവജനങ്ങൾക്കായി ഒരു സന്തോഷവാർത്ത. അകാലനര എന്നത് യുവജനതയ്ക്കിടയിലും കുട്ടികൾക്കിടയിലും ഇപ്പോൾ സാധാരണ വിഷയമായിക്കൊണ്ടിരിക്കുകയാണ്. കുട്ടികളിൽ പോലും കാണുന്ന അകാലനര വീട്ടിൽ ലഭ്യമായ വസ്തുക്കൾ കൊണ്ട് തന്നെ ഇല്ലാതാക്കാവുന്നതെ ഉള്ളൂ. നമ്മുടെ ജീവിത രീതികൾ മൂലവും അന്തരീക്ഷത്തിലെ മാറ്റങ്ങളും ആണ് അകാലനരയ്ക്ക് കാരണമാകുന്നത്. ഇതിനുള്ള പ്രതിവിധിയാണ് ഇന്ന് നോക്കാൻ പോകുന്നത്.
ആദ്യം പറയാൻ പോകുന്നത് പീച്ചിങ്ങ ഉപയോഗിച്ചുള്ള രീതിയാണ്. ഒരു പീച്ചിങ്ങ ചെറുതായി അരിഞ്ഞ് വെയിലത്ത് വെക്കുക. പീച്ചിങ്ങയിലെ വെള്ളം മുഴുവമായി പോകുവാൻ വേണ്ടിയാണിത്. ശേഷം ഒരു പാത്രത്തിൽ വെളിച്ചെണ്ണയെടുത്ത് അതിൽ പീച്ചിങ്ങ കഷ്ണങ്ങൾ ഇട്ടതിന് ശേഷം 10 മിനിറ്റ് നേരം ചൂടാക്കുക. തണുപ്പിച്ചതിന് ശേഷം എണ്ണ അരിച്ചെടുക്കുക. ഈ എണ്ണ മുടിയിലും തലയോട്ടിയിലും ഏകദേശം 45 മിനിറ്റ് നേരം മസ്സാജ് ചെയ്ത് പിടിപ്പിക്കുക. ശേഷം ഷാമ്പൂ ഉപയോഗിച്ച് മുടി കഴുകുക.
നെല്ലിക്ക ഉപയോഗിച്ചുള്ള കൂട്ട് ആണ് അടുത്തത്. വൈറ്റമിൻ സി, ആന്റിഓക്സിഡന്റുകൾ എന്നിവയുടെ കലവറയാണ് നെല്ലിക്ക. അതിനാൽ തന്നെ മുടിയിൽ മെലാനിന്റെ അളവ് നിലനിർത്താൻ നെല്ലിക്കയ്ക്ക് സാധിക്കുന്നു. മുടി നരയ്ക്കുന്നതിന് മാത്രമല്ല, മുടിയുടെ ആരോഗ്യത്തിനും നെല്ലിക്ക വളരെയധികം നല്ലതാണ്. നെല്ലിക്ക അരച്ച് തൈരിൽ ചേർത്ത് വേണം മുടിയിൽ പുരട്ടാൻ. മുടിയുമായി ബന്ധപ്പെട്ട ഏതൊരു പ്രശ്നത്തിനും നെല്ലിക്കയാണ് ഉത്തമ പരിഹാരം.
മുടിയുടെ ആരോഗ്യത്തിന് വേണ്ടി കെമിക്കലുകൾ പുരട്ടുന്നതിന് മുന്നേ ഇത്തരം വീട്ടുവൈദ്യങ്ങൾ പരീക്ഷിക്കുന്നത് നല്ലതാണ്. മുഖ സൗന്ദര്യത്തിനും ചർമ്മ സൗന്ദര്യത്തിനും വേണ്ടി നാം ചിലവാക്കുന്ന കുറച്ച് സമയം മുടിയുടെ പരിപാലനത്തിനും നൽകുക. വീട്ടിൽ ലഭ്യമായ വസ്തുക്കൾ ഉപയോഗിച്ച് തന്നെ മുടിയുടെ ആരോഗ്യത്തെ സൂക്ഷിക്കാവുന്നതേയുള്ളൂ.
