സാധാരണയായി വീട്ടമ്മമാര് നേരിടുന്ന പ്രശ്നമാണ് ചോറിന് ഇന്ന് എന്ത് കറിയാണ് ഉണ്ടാക്കേണ്ടത് എന്നുളളത്. ചില സമയങ്ങളില് വീട്ടില് കറി ഉണ്ടാക്കാന് ആവശ്യമായ പച്ചക്കറികള് ഉണ്ടായിരിക്കുകയുമില്ല. എന്നാല് ഇതുപ്പോലെ എന്ത് കറിയാണ് ചോറിന് കൂടെ വിളമ്പുക എന്ന പ്രതിസന്ധി വരുമ്പോള് പച്ചക്കറി കഷ്ണങ്ങള് ഒന്നും ഇല്ലാതെ തന്ന എളുപ്പം ഉണ്ടാക്കാവുന്ന ഒരു തൊടുകറിയുണ്ട്. വീട്ടിലെ കുറച്ചു സാധനങ്ങള് ഉപയോഗിച്ച് വളരെ എളുപ്പം തയ്യാറാക്കാവുന്ന സ്വാദിഷ്ടമായ ഒന്നാണ് ഈ തൊടുകറി. ഇത് ഉണ്ടാക്കിയെടുക്കാന് വളരെ എളുപ്പമാണ്.
അതിനായി ആദ്യം ഇത്തിരി വാളന് പുളിയെടുത്ത് വെളളത്തിലിട്ടു വയ്ക്കുക. പിന്നീട് ഒരു സ്പൂണ് കുരുമുളക്, ഒരു സ്പൂണ് ജീരകം, വെളുത്തുള്ളി, ഇഞ്ചി, ചെറിയ ഉള്ളി എന്നിവ മിക്സിയില് ഇട്ട് ഒന്ന് ചതച്ചെടുക്കുക. ശേഷം ഒരു ചീനച്ചട്ടി അടുപ്പില് വെച്ച് അതില് വെളിച്ചെണ്ണ ഒഴിച്ച് കടുകിട്ട് പൊട്ടിക്കുക. ശേഷം രണ്ട് വറ്റല് മുളകും കറിവേപ്പിലയും ഇട്ട് കൊടുക്കുക. ഇതിലേക്ക് നേരത്തെ ചതച്ച് തയ്യാറാക്കി വച്ചിരിക്കുന്ന മിശ്രിതം കൂടി ചേര്ത്ത് കൊടുക്കുക.
അതിലേക്ക് ഒരു സ്പൂണ് മുളകുപൊടിയും കാല് സ്പൂണ് മഞ്ഞള്പ്പൊടിയും ചേര്ത്ത് നന്നായി ഇളക്കി യോജിപ്പിക്കുക. ശേഷം അതിലേക്ക് വെളളത്തിലിട്ടു വെച്ച പുളി പിഴിഞ്ഞ് ചേര്ക്കുക. അതിലേക്ക് ആവശ്യത്തിനു വെളളവും ഉപ്പും കൂടി ചേര്ത്ത് കൊടുക്കുക. ഇത് നന്നായി തിളച്ചു വരുമ്പോള് തീ ഓഫ് ആക്കി അടുപ്പില് നിന്നും ഇറക്കി വെക്കുക. ചോറിന് കൂട്ടാനുളള കറി തയ്യാര്. വളരെ സ്വാദിഷ്ടമായ ഈ തൊടുകറി മാത്രം മതി ചോറിന് മറ്റൊന്നും വേണ്ട. ഒരു പപ്പടം കൂടി ഉണ്ടെങ്കില് ഊണ് ഉഷാര്. എല്ലാവരും ഇഷ്ടപ്പെടുന്ന ഒരു കറിയാണിത്.
