ചലച്ചിത്ര പ്രേമികൾ ആവേശത്തോടെ കാത്തിക്കുന്ന സിനിമയാണ് ദൃശ്യം 2. ആദ്യ ഭാഗത്തിന് ശേഷം ആരാധകർക്ക് മുന്നിലെത്താനുള്ള തയ്യാറെടുപ്പിലാണ് ജോർജു കുട്ടിയും കുടുംബവും. സിനിമയെ കുറിച്ചുള്ള ഓരോ വിശേഷങ്ങളും ആഘോഷമാക്കുകയാണ് ആരാധകർ. സിനിമയുടെ ഷൂട്ടിംഗ് ലൊക്കേഷനിൽ നിന്നും പുറത്തു വരുന്ന ചിത്രങ്ങൾ സാമൂഹ്യ മാദ്ധ്യമങ്ങളിൽ ചർച്ചയാകാറുണ്ട്. അത്തരത്തിലൊരു ചിത്രമാണ് ഇപ്പോൾ സാമൂഹ്യ മാദ്ധ്യമങ്ങളിൽ വൈറലാകുന്നത്. ചലച്ചിത്ര താരം മീനയാണ് ചിത്രം പങ്കുവെച്ചിരിക്കുന്നത്. സാമൂഹിക അകലം പാലിക്കുന്നു എന്ന കുറിപ്പോടെ തന്റെ ഇൻസ്റ്റഗ്രാം പേജിലൂടെയാണ് താരം ചിത്രം പങ്കുവെച്ചിരിക്കുന്നത്.
ജോർജ്കുട്ടിക്കൊപ്പം വീടിനുള്ളിൽ ഇരിക്കുന്ന റാണിയെയാണ് ചിത്രത്തിൽ കാണാൻ കഴിയുക. കൈലിയും ഷർട്ടുമാണ് ചിത്രത്തിൽ മോഹൻലാലിന്റെ വേഷം. സാരിയാണ് മീനയുടെ വേഷം. നിരവധി പേരാണ് ചിത്രത്തിന് താഴെ കമന്റുകളുമായെത്തിയിരിക്കുന്നത്. ജിത്തു ജോസഫിനൊപ്പമുള്ള മറ്റൊരു ചിത്രവും മീന പങ്കുവെച്ചിട്ടുണ്ട്.
കയ്യിൽ തേങ്ങയുമായി നിൽക്കുന്ന ജിത്തു ജോസഫിനെയും സമീപത്തായുള്ള മീനയുമാണ് ചിത്രത്തിലുള്ളത്. പാരയിൽ വെച്ച് തേങ്ങ പൊതിക്കാനൊരുങ്ങുന്ന ചിത്രമാണിത്. നേരത്തെ മോഹൻലാലും മീനയും എസ്തറും അൻസിബയും ഒന്നിച്ചുള്ള ജോർജു കുട്ടിയുടെ കുടുംബ ഫോട്ടോയും സാമൂഹ്യ മാദ്ധ്യമങ്ങളിൽ വൈറലായിരുന്നു. മോഹൻ ലാലും സംവിധായകൻ ജിത്തു ജോസഫും ചിത്രം പങ്കുവെച്ചിരുന്നു.
