തിരുവനന്തപുരം: വാഹനങ്ങളിലെ അനധികൃത മോഡിഫിക്കേഷനെതിരെ നടപടി ശക്തമാക്കാനൊരുങ്ങി മോട്ടോര് വാഹനവകുപ്പ്. നിയമവിരുദ്ധമായി വരുത്തുന്ന ഓരോ മോഡിഫിക്കേഷനും 5,000 രൂപ വീതം പിഴ ഈടാക്കും. പിഴ ചുമത്തിയ വാഹനങ്ങള് അനധികൃത മോഡിഫിക്കേഷനുകള് പൂര്ണമായി ഒഴിവാക്കിയ ശേഷം വീണ്ടും ഹാജരാക്കണമെന്നും നിര്ദേശമുണ്ട്. കഴിഞ്ഞ ദിവസത്തെ ഹൈക്കോടതി ഉത്തരവിന്റെ പശ്ചാത്തലത്തിലാണ് പരിശോധനയും നടപടികളും കര്ശനമാക്കുന്നത്.
കഴിഞ്ഞ മൂന്ന് മാസത്തിനിടെ അനധികൃത മോഡിഫിക്കേഷനുമായി ബന്ധപ്പെട്ട് സ്വീകരിച്ച നടപടികളുടെ വിശദാംശങ്ങള് സെപ്റ്റംബര് മൂന്നിനകം സമര്പ്പിക്കണമെന്ന് എല്ലാ ആര്ടിഒമാര്ക്കും ഗതാഗത കമ്മീഷണര് നിര്ദേശം നല്കി. ഇതുമായി ബന്ധപ്പെട്ട് സ്വീകരിച്ച നടപടികളുടെ റിപ്പോര്ട്ട് അടുത്ത മാസം ഏഴിന് സമര്പ്പിക്കണമെന്ന് ഹൈക്കോടതി നേരത്തെ ആവശ്യപ്പെട്ടിരുന്നു. സോഷ്യല് മീഡിയ റീലുകളും മറ്റ് വീഡിയോകളും ചിത്രീകരിക്കുന്നതിനായി നിയമവിരുദ്ധമായി രൂപമാറ്റം വരുത്തിയ വാഹനങ്ങള് പ്രത്യേകമായി കണ്ടെത്തണമെന്നും ഉദ്യോഗസ്ഥര്ക്ക് നിര്ദേശം നല്കിയിട്ടുണ്ട്.
വരും ദിവസങ്ങളില് സംസ്ഥാന വ്യാപകമായി വാഹന പരിശോധന ശക്തമാക്കാനാണ് എംവിഡിയുടെ തീരുമാനം. ഒന്നിലധികം നിയമലംഘനങ്ങള് കണ്ടെത്തിയാല് ഓരോ നിയമലംഘനത്തിനും പ്രത്യേകം 5,000 രൂപ വീതം പിഴ ഈടാക്കണമെന്നാണ് ഹൈക്കോടതി നിര്ദേശം. അടൂരില് പ്രളയദുരിതാശ്വാസ പ്രവര്ത്തനങ്ങള്ക്കായി എത്തിയ വാഹനത്തിന് പിഴ ചുമത്തിയ സംഭവവുമായി ബന്ധപ്പെട്ട് രണ്ട് മോട്ടോര് വാഹന വകുപ്പ് ഉദ്യോഗസ്ഥരെ സസ്പെന്ഡ് ചെയ്തതിനെ തുടര്ന്നുണ്ടായ കോടതി ഇടപെടലിലാണ് നിര്ണായക നിര്ദേശം.
ഒന്നിലധികം നിയമലംഘനങ്ങള് ഉണ്ടായാല് ഓരോന്നിനും 5,000 രൂപ വീതം പിഴ ഈടാക്കണമെന്നാണ് കോടതി വ്യക്തമാക്കിയത്. ഇതോടെ അനധികൃത ലൈറ്റുകള്, ശബ്ദമലിനീകരണമുണ്ടാക്കുന്ന സംവിധാനങ്ങള്, രൂപമാറ്റം വരുത്തിയ ബോഡി ഘടകങ്ങള് തുടങ്ങിയ നിയമവിരുദ്ധ മോഡിഫിക്കേഷനുകള്ക്കെതിരെ വരും ദിവസങ്ങളില് കര്ശന പരിശോധനയും നടപടികളും ഉണ്ടാകുമെന്നാണ് മോട്ടോര് വാഹനവകുപ്പിന്റെ മുന്നറിയിപ്പ്.
