തിരുവനന്തപുരം: പൊലീസ് സ്റ്റേഷനിലെ ഓണാഘോഷത്തിനിടെ മദ്യപിച്ചെത്തിയ മൂന്ന് പൊലീസുകാര് റൂറല് ജില്ലാ പൊലീസ് മേധാവിയുടെ മിന്നല് പരിശോധനയില് കുടുങ്ങി. അരുവിക്കര പൊലീസ് സ്റ്റേഷനിലാണ് സംഭവം. സംഭവത്തില് സിവില് പൊലീസ് ഓഫീസര്മാരായ അച്ചു ശങ്കര്, പ്രശാന്ത്, അനില്കുമാര് എന്നിവരെ സസ്പെന്ഡ് ചെയ്തു.
ഞായറാഴ്ചയായിരുന്നു അരുവിക്കര പൊലീസ് സ്റ്റേഷനിലെ ഓണാഘോഷം. ഇതിനിടെയാണ് റൂറല് ജില്ലാ പൊലീസ് മേധാവി പ്രശാന്തന് കാണിയുടെ നേതൃത്വത്തില് അപ്രതീക്ഷിത പരിശോധന നടത്തിയത്. പരിശോധനയ്ക്കിടെ പൊലീസുകാര് മദ്യപിച്ചിരുന്നതായി കണ്ടെത്തുകയായിരുന്നു. മേലുദ്യോഗസ്ഥന് മുന്നിലെത്തിയിട്ടും പൊലീസുകാര് സല്യൂട്ട് ചെയ്യാന് പോലും മറന്നതോടെയാണ് സംശയം ശക്തമായത്.
ഇതേക്കുറിച്ച് ചോദ്യം ചെയ്തപ്പോള് മദ്യപിച്ചിട്ടില്ലെന്നായിരുന്നു പൊലീസുകാരുടെ മറുപടി. ഇതിനിടെ ഒരാള് സ്റ്റേഷനില്നിന്ന് ഓടിരക്ഷപ്പെടാനും ശ്രമിച്ചതായാണ് വിവരം. തുടര്ന്ന് നടത്തിയ പരിശോധനയില് മദ്യപിച്ച് ഔദ്യോഗിക ചുമതലയില് വീഴ്ച വരുത്തിയതായി കണ്ടെത്തിയതിനെ തുടര്ന്നാണ് മൂന്ന് പേര്ക്കെതിരെയും അച്ചടക്ക നടപടി സ്വീകരിച്ചത്. സംഭവത്തില് വകുപ്പ് തല അന്വേഷണം ആരംഭിച്ചിട്ടുണ്ട്. പൊലീസ് സ്റ്റേഷനില് ഔദ്യോഗിക ചുമതലയിലിരിക്കെ ഇത്തരം വീഴ്ചകള് ഉണ്ടായത് ഗൗരവത്തോടെയാണ് പൊലീസ് വകുപ്പ് കാണുന്നത്.
