വിടര്ന്ന കണ്ണുകളും ചെറു പുഞ്ചിരിയും ചേര്ന്ന മുഖവുമായി സിനിമ ലോകത്തേക്ക് കടന്നു വന്ന ശ്രീവിദ്യ എന്ന നടി തന്റെ കഥാപാത്രങ്ങളിലൂടെ മലയാളി മനസ്സുകളില് സ്ഥാനം കണ്ടെത്തി. സൗമ്യമായ സ്വഭാവവും ശാന്തമായ പ്രകൃതവും ഈ നടിയെ മലയാളികളുടെ സ്വന്തമാക്കി. ആര്. കൃഷ്ണ മൂര്ത്തിയുടെയും പ്രശസ്ത ഗായിക എം.എല്. വസന്തകുമാരിയുടേയും മകളായ ശ്രീവിദ്യ ചെറുപ്പം മുതല് തന്നെ സംഗീതത്തിലും നൃത്തത്തിലും തന്റെ കഴിവ് തെളിയിച്ചിരുന്നു. പതിമൂന്നാമത്തെ വയസ്സില് ‘തിരുവുള് ചൊല്വര്’ എന്ന തമിഴ് സിനിമയിലൂടെയാണ് ശ്രീവിദ്യ സിനിമയില് എത്തുന്നത്. പിന്നീട് 1969-ല് എന്. ശങ്കരന് നായര് സംവിധാനം ചെയ്ത ‘ചട്ടമ്പിക്കവല’ എന്ന ചിത്രത്തിലൂടെ സത്യന്റെ നായികയായി ശ്രീവിദ്യ മലയാള സിനിമയില് തന്റെ അരങ്ങേറ്റം കുറിച്ചു.
സംഗീതത്തിന്റെയും നൃത്തത്തിന്റെയും ലോകത്തു വളര്ന്നു വന്ന ഈ താരത്തിന് അഭിനയത്തില് തന്റെ സ്ഥാനം ഉറപ്പിക്കുക അത്ര പ്രയാസമല്ലായിരുന്നു. റൗഡി രാജമ്മ, ഇടവഴിയിലെ പൂച്ച മിണ്ടാപ്പൂച്ച, പഞ്ചവടിപ്പാലം തുടങ്ങിയ ചിത്രങ്ങളിലൂടെ സിനിമയില് തന്റേതായ ഒരു ശൈലി കൊണ്ടുവരാന് ശ്രീവിദ്യക്കു സാധിച്ചു. പ്രശസ്ത പുണ്യപുരാണ ചിത്രമായ ‘അംബ അംബിക അംബാലികയിലെ’ വേഷവും വളരെ ശ്രദ്ധേയമായിരുന്നു. ‘സൊല്ലത്താന് നിനക്കിറേന്’, ‘അപൂര്വരാഗങ്ങള്’ എന്നീ ചിത്രങ്ങളിലൂടെ തമിഴ് സിനിമ ലോകത്തും ശ്രീവിദ്യ എന്ന നടി തന്റെ കഴിവ് തെളിയിച്ചു.
പിന്നീട് മലയാളം, കന്നട, തമിഴ്, ഹിന്ദി തുടങ്ങി ആറു ഭാഷകളില് ശ്രീവിദ്യ അഭിനയിച്ചു. ഗായിക കൂടിയായ ശ്രീവിദ്യ’അയലത്തെ സുന്ദരി’ എന്ന ചിത്രത്തിലൂടെ ചലച്ചിത്ര പിന്നണി ഗാനരംഗത്ത് കാലെടുത്തു വെച്ചു. മികച്ച നടിക്കുള്ള സംസ്ഥാന സര്ക്കാറിന്റെ അവാര്ഡ് ശ്രീവിദ്യയ്ക്ക് ലഭിച്ചിട്ടുണ്ട്. മലയാള സീരിയല് രംഗത്തും സജീവമായിരുന്നു ശ്രീവിദ്യ, 2004-ലെ ‘അവിചാരിതം’ എന്ന പരമ്പരയിലെ അഭിനയത്തിന് മികച്ച നടിക്കുള്ള സംസ്ഥാന സര്ക്കാരിന്റെ ടി വി അവാര്ഡും സ്വന്തമാക്കി. 2006 ഒക്ടോബര് 19-ന് കാന്സര് ബാധിച്ചതിനെ തുടര്ന്ന് ശ്രീവിദ്യ ലോകത്തോട് വിട പറഞ്ഞു.
