ആശ്വസിച്ച്‌ തലസ്ഥാന നഗരി; കൊറോണ വ്യാപനം കുറയുന്നു

തിരുവനന്തപുരം: തിരുവനന്തപുരം ജില്ലയില്‍ കൊറോണ വ്യാപനം കുറയുന്നതായി ആരോഗ്യവകുപ്പ്. കഴിഞ്ഞ കുറേ ദിവസങ്ങളായി ജില്ലയില്‍ പ്രതിദിന രോഗികളുടെ എണ്ണം കുറയുകയാണ്. ചികിത്സയിലുള്ള രോഗികളുടെ എണ്ണത്തിലും കുറവാണ് രേഖപ്പെടുത്തിയത്. ജില്ലയിലെ ആരോഗ്യ സംവിധാനങ്ങളുടെ പ്രവര്‍ത്തനത്തിന് വലിയ ആശ്വാസം പകരുന്നതാണ് ഇതെന്നും ആരോഗ്യവകുപ്പ് അറിയിച്ചു.

രോഗികളുടെ എണ്ണം കുറയുന്നത് ആശ്വാസത്തിനു വകനല്‍കുന്നതാണെങ്കിലും ജാഗ്രത ഇനിയും ശക്തിപ്പെടുത്തുക തന്നെ വേണമെന്നു ജില്ലാ കളക്ടര്‍ ഡോ. നവ്‌ജ്യോത് ഖോസ പറഞ്ഞു. രോഗം സ്ഥിരീകരിച്ച്‌ ചികിത്സയിലുള്ളവരുടെ എണ്ണം ഈ മാസം ഏഴിന് 12,752 ആയിരുന്നു. അതിനു ശേഷം ഓരോ ദിവസവും രോഗികളുടെ എണ്ണം ക്രമേണ കുറയുകയാണ്. ഇന്നലെവരെയുള്ള കണക്കു പ്രകാരം ജില്ലയില്‍ രോഗം ബാധിച്ചു ചികിത്സയിലുള്ളവരുടെ എണ്ണം 9,106 ആണ്.