ദുബായ് : മുംബൈക്കെതിരെ ഉജ്ജ്വല ജയം കുറിച്ച് രാജസ്ഥാൻ റോയൽസും ചലഞ്ചേഴ്സിനെതിരെ ആശ്വാസ ജയം കുറിച്ച് ചെന്നൈയും പോയിന്റ് പട്ടികയിൽ നില മെച്ചപ്പെടുത്തി. ലീഗ് റൗണ്ടിൽ ഇനി പതിനൊന്ന് മത്സരങ്ങൾ മാത്രം അവശേഷിക്കെ ആദ്യ നാലു സ്ഥാനത്തിനായുള്ള പോരാട്ടത്തിലാണ് ടീമുകൾ.
നിലവിൽ പോയിന്റ് പട്ടികയിൽ 14 പോയിന്റുകളുമായി മുംബൈ ഇന്ത്യൻസാണ് ഒന്നാമത്. റൺറേറ്റിന്റെ അടിസ്ഥാനത്തിൽ ഡൽഹിയും ബാംഗളൂരും രണ്ടും മൂന്നും സ്ഥാനങ്ങളിൽ നിലയുറപ്പിക്കുമ്പോൾ 12 പോയിന്റുമായി നാലാമതാണ് കൊൽക്കത്ത.
പോയിന്റ് പട്ടികയിൽ അവസാന സ്ഥാനത്തുള്ള ചെന്നൈക്ക് ഇനി രണ്ടു കളികൾ മാത്രമാണ് അവശേഷിക്കുന്നത്. ഇത് രണ്ടും ജയിച്ചാലും അവസാന നാലിൽ ഇടം നേടാൻ അത്ഭുതങ്ങൾ സംഭവിക്കണം. രണ്ടു കളികൾ മാത്രം അവശേഷിക്കുന്ന രാജസ്ഥാൻ റോയൽസിനാകട്ടെ രണ്ടും നിർണായകമാണ്. അവസാന നാലിൽ ഇടം പിടിക്കുന്നവരെ നിർണയിക്കുന്ന കളികളാണിവ.
മുംബൈ ഇന്ത്യൻസും ഡൽഹി ക്യാപിറ്റൽസും ആദ്യ രണ്ട് സ്ഥാനക്കാർക്കായുള്ള പോരാട്ടം കടുപ്പിക്കുമ്പോൾ റോയൽ ചലഞ്ചേഴ്സും ഒരു കൈ നോക്കാനുള്ള ശ്രമത്തിൽ തന്നെയാണ്. കൊൽക്കത്തയുടെ ഇന്നത്തെ മത്സരം കിംഗ്സ് ഇലവൻ പഞ്ചാബുമായിട്ടാണ്. ഈ കളിയും നിർണായകമാണ്. എന്തായാലും രണ്ട് ദിവസത്തിനുള്ളിൽ അവസാന നാലിനെക്കുറിച്ച് ഏറെക്കുറെ തീരുമാനമാകും.
