ന്യൂഡല്ഹി: ഓണ്ലൈന് കേന്ദ്രീകരിച്ചുളള വില്പനയും മാര്ക്കറ്റിംഗും രാജ്യത്തെ എല്ലാ വ്യാവസായിക മേഖലയിലും കൂടുതല് സജീവമാകുകയാണ്. കൊറോണയുടെ പശ്ചാത്തലത്തിലും രാജ്യത്തെ വാഹന വിപണിയിലടക്കം സമാന്തര ബിസിനസ് വളര്ച്ചാ സാധ്യതകളാണ് ഇത് തുറന്നിടുന്നത്. കഴിഞ്ഞ ഒരു വര്ഷത്തിലധികമായി ഓണ്ലൈന് വഴിയുളള വാഹനബുക്കിംഗില് വന് കുതിപ്പാണ് രേഖപ്പെടുത്തിയതെന്ന് രാജ്യത്തെ പ്രമുഖ വാഹന നിര്മാതാക്കളായ മാരുതി സാക്ഷ്യപ്പെടുത്തുന്നു. 2019 ഏപ്രില് മുതല് രണ്ട് ലക്ഷത്തിലധികം മാരുതി വാഹനങ്ങളാണ് ഓണ്ലൈന് അന്വേഷണങ്ങള് വഴി വിറ്റുപോയത്.
ഉപഭോക്താക്കള്ക്ക് അവര്ക്ക് താല്പര്യമുളള വില്പനക്കാരെ വളരെ വേഗം കണ്ടെത്താനും ബന്ധപ്പെടാനും ഓണ്ലൈനിലൂടെ കഴിയുന്നുണ്ടെന്ന് മാരുതി സുസുക്കി ഇന്ത്യ വ്യക്തമാക്കി. 2017 ലാണ് മാരുതി വാഹനങ്ങള്ക്കായി ഓണ്ലൈന് ബുക്കിംഗ് ആരംഭിച്ചത്. ലളിതവും സുതാര്യവുമായ നടപടികള് ഉപഭോക്താക്കളെ പെട്ടന്ന് തീരുമാനമെടുക്കാന് സഹായിക്കുമെന്നും മാരുതി ചൂണ്ടിക്കാട്ടി. മാരുതിയുടെ മൊത്തം വില്പനയില് 20 ശതമാനവും ഓണ്ലൈന് ബുക്കിംഗായി വര്ദ്ധിച്ചിരുന്നു. കൊറോണയുടെ പശ്ചാത്തലത്തില് കഴിഞ്ഞ അഞ്ച് മാസങ്ങളായി ഇത് 33 ശതമാനമായി ഉയര്ന്നതായും കമ്പനി പറയുന്നു.
ഉപഭോക്താക്കളുടെ സമീപത്തുളള ഡീലര്മാരെ (Near Me) കുറിച്ചുളള അന്വേഷണങ്ങളില് മാത്രം രണ്ട് മടങ്ങ് വര്ദ്ധനയാണ് ഉണ്ടായത്. 21 ലക്ഷം അന്വേഷണങ്ങളാണ് ഡിജിറ്റല് ചാനലുകള് വഴി ലഭിച്ചതെന്നും മാരുതിയുടെ മാര്ക്കറ്റിംഗ് ആന്ഡ് സെയില്സ് എക്സിക്യൂട്ടീവ് ഡയറക്ടര് ശശാങ്ക് ശ്രീവാസ്തവ വ്യക്തമാക്കി. രണ്ട് വര്ഷം മുന്പാണ് വാഹന വില്പനയ്ക്കായി മാരുതി ഓണ്ലൈന് രംഗത്ത് സാന്നിധ്യം സജീവമാക്കിയത്. രാജ്യത്തെ ആയിരത്തോളം ഡീലര്മാരെ ഓണ്ലൈന് ശൃംഖല ബന്ധപ്പെടുത്തുന്നുണ്ടെന്ന് കമ്പനി പ്രസ്താവനയില് വ്യക്തമാക്കി. ഡീലര്ഷിപ്പ് വെബ്സൈറ്റുകളില് ഉപഭോക്താക്കളുടെ സന്ദര്ശനം സജീവമാണെന്നും കമ്പനി ചൂണ്ടിക്കാട്ടുന്നു.
72 ശതമാനം വാഹന ഉപഭോക്താക്കളും ഡീലര്മാരെ തെരയുന്നത് ഓണ്ലൈന് വഴിയാണെന്നാണ് ഗൂഗിള് നടത്തിയ ഗവേഷണങ്ങളില് വ്യക്തമാകുന്നത്. ഗൂഗിളിന്റെ ഓട്ടോ ഗിയര് ഷിഫ്റ്റ് ഇന്ത്യ 2020 റിപ്പോര്ട്ട് പ്രകാരം രാജ്യത്തെ 95 ശതമാനം കാറുകളുടെ വില്പനയിലും ഡിജിറ്റല് സ്വാധീനം പ്രകടമാണ്. വാഹനം സ്വന്തമാക്കാന് തീരുമാനമെടുക്കുമ്പോള് തന്നെ ഉപഭോക്താക്കള് ഓണ്ലൈനിലൂടെ അന്വേഷണം ആരംഭിക്കും. പിന്നീടാണ് നേരിട്ട് ഡീലര്മാരെ നേരിട്ട് ബന്ധപ്പെടുകയെന്നും ഗൂഗിള് വ്യക്തമാക്കുന്നു.
