ടെഹ്റാന്: അന്താരാഷ്ട്രതലത്തില് തങ്ങളെ ഒറ്റപ്പെടുത്താനായി ശക്തമായ സമ്മര്ദ്ദം എന്ന അമേരിക്കയുടെ നയം പൊളിഞ്ഞതായി ഇറാന്. അമേരിക്കന് സ്റ്റേറ്റ് സെക്രട്ടറിയെ വിമര്ശിച്ചുകൊണ്ടാണ് ടെഹ്റാന് വിദേശകാര്യമന്ത്രാലയം പ്രസ്താവന നടത്തിയത്. അമേരിക്കയില് അധികാര കൈമാറ്റം ഉറപ്പായതോടെയാണ് ഇറാന് അമേരിക്കയ്ക്കും പോംപിയോയ്ക്കുമെതിരെ പ്രസ്താവനയുമായി രംഗത്തെത്തിയത്.
‘പുറത്തേക്കുള്ള വഴി തുറന്നിരിക്കുന്ന സെക്രട്ടറി മൈക്ക് പോംപിയോയുടെ നിരാശ ഞങ്ങള്ക്ക് മനസ്സിലാകും. അദ്ദേഹം നടപ്പാക്കാന് ശ്രമിച്ചിരുന്ന പരമാവധി സമ്മര്ദ്ദമെന്ന തന്ത്രം വന് പരാജയമാണെന്ന് അമേരിക്ക സമ്മതിക്കണം’ ഇറാന് വിദേശകാര്യ വക്താവ് സയീദ് ഖാത്തിബ്സാദേ പറഞ്ഞു.
സംയുക്ത കര്മ്മ പദ്ധതിയെന്ന നയത്തില് നിന്നും ട്രംപ് അധികാരമേറ്റ ശേഷം ആണവ വിഷയം പറഞ്ഞാണ് ഇരുരാജ്യങ്ങളും അകന്നത്. അതിനൊപ്പം സുഹൃദ് രാജ്യങ്ങളെക്കൊണ്ടും ഇറാന് മേല് പലവിധ സമ്മര്ദ്ദങ്ങളാണ് അമേരിക്ക ചെലുത്തിക്കൊണ്ടിരിക്കുന്നത്. ജൂലൈ 2015ലെ ആണവ നിര്വ്യാപന കരാര് ഇറാന് ലംഘിച്ചുവെന്നാണ് അമേരിക്ക ആരോപിക്കുന്നത്. അമേരിക്കയുടെ വാദത്തെ യു.എന്.സുരക്ഷാ കൗണ്സിലും അംഗീകരിച്ചതോടെ ഇറാന് മേല് നിയന്ത്രണങ്ങള് മുറുകി.
