പ്രധാനമന്ത്രി തിരുവനന്തപുരത്ത് വരുമ്പോൾ സ്വീകരിക്കുന്നത് ബിജെപി മേയർ ആയിരിക്കുമെന്ന് നടൻ കൃഷ്ണകുമാർ

കൊച്ചി: തദ്ദേശ തിരഞ്ഞെടുപ്പിൽ ബിജെപി എറ്റവും കൂടുതൽ പ്രതീക്ഷ പുലർത്തുന്ന ജില്ലയാണ് തിരുവനന്തപുരം. കഴിഞ്ഞ തവണ രണ്ടാം സ്ഥാനത്ത് എത്തിയ കോർപ്പറേഷനിൽ ഇത്തവണ അധികാരം പിടിച്ചെടുക്കാനുള്ള കഠിന പ്രയത്‌നത്തിലാണ് പാർട്ടി. സംസ്ഥാന-ജില്ലാ നേതാക്കളാണ് നേരിട്ട് മത്സരരംഗത്തിറങ്ങിയിരിക്കുന്നത്. അതുകൊണ്ടുതന്നെ തിരുവനന്തപുരത്തെ പ്രചാരണത്തിലും ബിജെപിയും എൻഡിഎയും അതീവ ശ്രദ്ധയാണ് നൽകുന്നത്. പാർട്ടി നേതാക്കൾക്ക് പുറമെ സിനിമാതാരങ്ങളടക്കം പ്രചാരണവേദികളിൽ സജീവമായിക്കഴിഞ്ഞു.

സുരേഷ് ഗോപി എംപിക്ക് പുറമേ കൃഷ്ണകുമാർ അടക്കമുള്ള താരങ്ങൾ പ്രചാരണരംഗത്തുണ്ട്. ചിത്രങ്ങളും വിശേഷങ്ങളും പങ്കുവച്ച് സമൂഹമാദ്ധ്യമങ്ങളിലും ഇവർ പ്രചാരണം കൊഴിപ്പിക്കുകയാണ്. ഇവരുടെ പല കുറിപ്പുകളും സ്ഥാനാർത്ഥികളുടെ അനുയായികൾ വാശിയോടെയാണ് പങ്കുവയ്‌ക്കുന്നത്. തിരുവനന്തപുരത്തെ പ്രചാരണങ്ങൾക്കിടെ നടൻ കൃഷ്ണകുമാർ പങ്കുവച്ച കുറിപ്പാണ് ഇപ്പോൾ വോട്ടർമാർക്കിടയിൽ ചർച്ചയായിരിക്കുന്നത്്്.

വരുന്ന നിയമസഭ തിരഞ്ഞെടുപ്പ് പ്രചാരണത്തിന് പ്രധാനമന്ത്രി നരേന്ദ്രമോദി തിരുവനന്തപുരത്തു വരുമ്പോൾ വിമാനത്താവളത്തിൽ സ്വീകരിക്കുന്നത് ബിജെപിയുടെ മേയർ ആയിരിക്കുമെന്ന കൃഷ്ണകുമാറിന്റെ വാക്കുകളാണ് പാർട്ടി അനുയായികളേയും വോട്ടർമാരേയും ഒരുപോലെ ആവേശത്തിലാക്കിയത്.

കുറിപ്പിന്റെ പൂർണരൂപം

ഇന്നലെ ബിജെപി സ്ഥാനാർഥികളുടെ രണ്ടു വേദികളിൽ പങ്കെടുത്തു. വാഴോട്ട്‌കൊണവും, പേരൂർക്കടയും. കുമാരി ദേവി കാർത്തികയും, ശ്രീമതി ലാലി ശ്രീകുമാറുമാണ് സ്ഥാനാർഥികൾ. വളരെ നല്ല സ്ഥാനാർഥികൾ. പ്രവർത്തകരുടെ ആവേശവും സദസ്സിന്റെ പ്രതികരണവും സൂചിപ്പിക്കുന്നത് വരുന്ന നിയമ സഭ തിരഞ്ഞെടുപ്പിന്നു പ്രചാരണത്തിന് നമ്മുടെ ആദരണീയനായ പ്രധാനമന്ത്രി ശ്രി നരേന്ദ്രമോദി തിരുവനന്തപുരത്തു വരുമ്പോൾ വിമാനത്താവളത്തിൽ സ്വീകരിക്കുന്നത് ബിജെപി യുടെ മേയർ ആയിരിക്കും. നമ്മൾ ജയിക്കും നമ്മൾ ഭരിക്കും.