മുംബൈ: ചിത്രീകരണത്തിനിടെ പരിക്കേറ്റ് വിശ്രമത്തിലാണെന്ന റിപ്പോർട്ടുകൾ സ്ഥിരീകരിച്ച് നടി രശ്മിക മന്ദാന. ‘മൈസ’ സിനിമയുടെ നൃത്തരംഗം ചിത്രീകരിക്കുന്നതിനിടെയാണ് പരിക്കേറ്റതെന്ന് താരം ഇൻസ്റ്റഗ്രാമിലൂടെ അറിയിച്ചു.
വലതുവശത്തെ ഇടുപ്പിലെ നാല് ടെൻഡണുകളിൽ ഒന്ന് വേർപെട്ട നിലയിലാണെന്ന് രശ്മിക വെളിപ്പെടുത്തി. കാൽ പൂർണമായി ഉയർത്താൻ കഴിയണമെങ്കിൽ പരിക്ക് ഭേദമാകേണ്ടതുണ്ടെന്നും അവർ പറഞ്ഞു. താൻ ഇതുവരെ അഭിനയിച്ചതിൽ ഏറ്റവും ശാരീരികാധ്വാനം ആവശ്യമായ ചിത്രമാണ് ‘മൈസ’. ചിത്രത്തിലെ നൃത്തരംഗം ചിത്രീകരിക്കുന്നതിനിടെയാണ് പരിക്കേറ്റതെന്നും താരം വ്യക്തമാക്കി. അടുത്ത കാലത്തിനിടെ തനിക്ക് സംഭവിക്കുന്ന തുടർച്ചയായ മൂന്നാമത്തെ പരിക്കാണിതെന്നും രശ്മിക കൂട്ടിച്ചേർത്തു.
ശരീരത്തെ ഒരു യന്ത്രമായി കാണാതെ മനുഷ്യശരീരമായി കാണാൻ സ്വയം പഠിക്കുകയാണെന്ന് രശ്മിക കുറിച്ചു. ഇപ്പോഴുള്ള വേദന സഹിക്കാവുന്നതാണെന്നും ഈ വിശ്രമകാലത്തെ നിർബന്ധിത ഇടവേളയായാണ് കാണുന്നതെന്നും അവർ പറഞ്ഞു. വിശ്രമസമയത്ത് പസിലുകൾ പരിഹരിച്ചാണ് സമയം ചെലവഴിക്കുന്നതെന്നും സ്ഥിരമായി ചെയ്തിരുന്ന വർക്കൗട്ടും ഓട്ടവും മുടങ്ങിയതിൽ വിഷമമുണ്ടെന്നും താരം തമാശരൂപേണ പങ്കുവെച്ചു.
ആരാധകർ ആശങ്കപ്പെടേണ്ടതില്ലെന്നും ആവശ്യമെങ്കിൽ ആരോഗ്യനിലയെക്കുറിച്ചുള്ള കൂടുതൽ വിവരങ്ങൾ പങ്കുവെക്കാമെന്നും അറിയിച്ചാണ് രശ്മികയുടെ കുറിപ്പ് അവസാനിക്കുന്നത്. നേരത്തെ, ഈ പരിക്കിനെ തുടർന്ന് ഡോക്ടർമാർ ആറാഴ്ചത്തെ വിശ്രമം നിർദേശിച്ചതായി റിപ്പോർട്ടുകൾ പുറത്തുവന്നിരുന്നു. എന്നാൽ ഇതുസംബന്ധിച്ച ഔദ്യോഗിക വിശദീകരണം ഇപ്പോഴാണ് രശ്മിക ഇൻസ്റ്റഗ്രാമിലൂടെ നൽകിയത്.
