മിലാന്: ഇറ്റാലിയന് ലീഗില് ഇന്ന് കരുത്തന്മാരുടെ പോരാട്ടം. യുവന്റസ് ബെനവെന്റോയ്ക്കെതിരേയും ഇന്റര് മിലാന് സാസുവോളയ്ക്കെതിരേയുമാണ് ലീഗില് കളിക്കാനിറങ്ങുന്നത്.
സൂപ്പര്താരം ക്രിസ്റ്റ്യാനോ റൊണാള്ഡോ ഇല്ലാതെയാണ് യുവന്റസ് ഇന്ന് ഇറങ്ങുന്നത്. ഇന്നത്തെ മത്സരത്തില് നിന്നും പോര്ച്ചുഗല് താരത്തിന് ക്ലബ് വിശ്രമം അനുവദിച്ചിരിക്കുകയാണ്. മുപ്പത്തഞ്ച് കാരനായ റൊണാള്ഡോ സീസണിന്റെ തുടക്കം മുതല് ശക്തമായ ഫോമിലാണ്.ലീഗിലെ ഏഴു മത്സരങ്ങളിലായി 9 ഗോളുകള് താരം നേടിക്കഴിഞ്ഞു. ഈ നവംബറില് മാത്രം രാജ്യത്തിനായും ക്ലബ്ബിനായും റൊണാള്ഡോ എട്ടു മത്സരം കളിച്ചുകഴിഞ്ഞു. റൊണാള്ഡോയ്ക്ക് തൊട്ടുമുന്നില് സീസണില് ഗോള്വേട്ടക്കാരനയുള്ളത് എ.സി. മിലാന്റെ സ്ലാതന് ഇബ്രഹിമോവിച്ചാണ്. പത്തു ഗോളുകളാണ് ഇബ്രി നേടിയത്. സീരി ഏയില് യുവന്റസ് നിലവില് നാലാം സ്ഥാനത്താണ്. എ.സി.മിലാനാണ് നിലവില് ലീഗില് ഒന്നാമതുള്ളത്.
ലീഗില് ഇന്ന് നടക്കുന്ന രണ്ടാം മത്സരത്തില് ഇന്റര് മിലാന് മികച്ച ഫോമിലുള്ള സാസുവോളോയ്ക്കെതിരെ കളിക്കാനിറങ്ങും. ഇന്ര് യുവന്റസിന് താഴെ ലീഗില് അഞ്ചാം സ്ഥാനത്താണുള്ളത്. എന്നാല് സീസണില് അപ്രതീക്ഷിത മുന്നേറ്റവുമായി സാസുവോള രണ്ടാം സ്ഥാനത്ത് തുടരുകയാണ്. മൂന്ന് താരങ്ങളുടെ കൊറോണ ബാധ കാരണം ഇന്ററിനായി ഇന്ന് കളിക്കില്ല. ഡാനിയേലെ പെഡെല്ലി, മാര്സെല്ലോ ബ്രോസോവിച്ച്, അലക്സാണ്ടര് കൊറോലോവ് എന്നിവരാണ് പുറത്തിരിക്കുന്നത്. ചാമ്പ്യന്സ് ലീഗില് മികച്ച ഫോം പുറത്തെടുത്ത അഷറഫ് ഹക്കീമിയും റൊമേലൂ ലൂക്കാകുവും ആഷ്ലി യംങും ഇന്ന് ഇന്ററിനായി പന്ത് തട്ടും.
