തെന്നിന്ത്യന് സിനിമ ലോകത്തെ നിറസാന്നിധ്യമായിരുന്നു സൗന്ദര്യ. കിളിച്ചുണ്ടന് മാമ്പഴം, യാത്രക്കാരുടെ ശ്രദ്ധയ്ക്ക് എന്നീ രണ്ടു സിനിമകളിലൂടെ മലയാളികളുടെ മനസ്സില് സ്ഥാനം നേടിയ സൗന്ദര്യയുടെ നിഷ്കളങ്കമായ മുഖവും ചിരിയും ഇന്നും പ്രേക്ഷക മനസ്സില് നിറഞ്ഞു നല്ക്കുന്നു. ചലച്ചിത്ര നിര്മ്മാതാവും എഴുത്തുകാരനുമായ സത്യനാരായണന്റേയും മഞ്ജുളയുടേയും മകളായി ഒരു ബ്രാഹ്മണ കുടുംബത്തില് 1972 ജൂലൈ 18 നാണ് സൗന്ദര്യ ജനിച്ചത്. 1992ല് പുറത്തിറങ്ങിയ ഗാന്ധര്വ എന്ന ചിത്രത്തിലൂടെ സിനിമ രംഗത്തേക്ക് കാലെടുത്തു വെച്ചു സൗന്ദര്യ പിന്നീട് എംബിബിഎസ് പഠനകാലത്ത് അമ്മൊരു എന്ന കന്നട ചിത്രത്തില് അഭിനയിക്കുകയും ചിത്രം വിജയിച്ചതോടെ പഠനം പാതിവഴിയില് നിര്ത്തുകയും ചെയ്തു.
കന്നട സിനിമയിലൂടെ അഭിനയ രംഗത്തേക്ക് കടന്നു വന്ന സൗന്ദര്യ അധികം വൈകാതെ തന്നെ മറ്റു ഭാഷകളിലും തന്റെ കഴിവ് തെളിയിക്കുകയും വളരെ പെട്ടന്നു തന്നെ തെലുങ്കിലെ മുന്നിര നായികയായി മാറുകയും ചെയ്തു. കന്നട, തെലുങ്ക്, തമിഴ്, ഹിന്ദി, മലയാളം എന്നീ ഭാഷകളിലായി നൂറോളം ചിത്രങ്ങളില് സൗന്ദര്യ അഭിനയിച്ചിട്ടുണ്ട്. ബോളിവുഡില് അമിതാബ് ബച്ചന് നായകനായ സൂര്യവംശം എന്ന ചിത്രത്തിലാണ് സൗന്ദര്യ അഭിനയിച്ചത്. കൂടാതെ തെന്നിന്ത്യയിലെ മുന്നിര നായകന്മാരായ വിഷ്ണുവര്ദ്ധന്, രജനികാന്ത്, ചിരഞ്ജീവി, കമലഹാസന്, മോഹന്ലാല്, ജയറാം തുടങ്ങിയവരോടൊപ്പവും അഭിനയിച്ചിട്ടുണ്ട്.
എന്നാല് ഈ അഭിനയ സൗന്ദര്യം അധികകാലം സിനിമാലോകത്ത് നിലനിന്നില്ല. തിരഞ്ഞെടുപ്പ് പ്രചാരണ റാലിക്കിടെ സൗന്ദര്യ സഞ്ചരിച്ചിരുന്ന വിമാനം അപകടത്തില് പെട്ട് 2004 ഏപ്രില് 18 നാണ് സൗന്ദര്യ വിടപറഞ്ഞത്. ഫാസില് സംവിധാനം ചെയ്ത മണിച്ചിത്രത്താഴ് എന്ന ചിത്രത്തിന്റെ കന്നട റീമേക്കായ ആപ്തമിത്രയാണ് സൗന്ദര്യയുടെ അവസാന ചിത്രം. മോഡേണ് തെലുങ്ക് സിനിമയുടെ സാവിത്രി എന്നായിരുന്നു സിനിമ ലോകം സൗന്ദര്യയെ വിശേഷിപ്പിച്ചിരുന്നത്.
