ആരും ഇഷ്ടപ്പെടുന്ന ഒന്നാണ് വെളളത്തിനു മുകളിലൂടെ ഒരു യാത്ര. എന്നാല് കൊറോണ മഹാമാരിയെ തുടര്ന്ന് വിനോദ സഞ്ചാര കേന്ദ്രങ്ങള്ക്ക് പൂട്ടു വീണു. ഇപ്പോള് ടൂറിസം മേഖല വീണ്ടും സജീവമായി തുടങ്ങി. തുടര്ന്ന് പെരിയാറിന്റെ തീരത്തുകൂടി പ്രകൃതി ഭംഗി ആസ്വദിച്ചു കൊണ്ടുളള അതിമനോഹരമായ യാത്രയ്ക്കായി സഞ്ചാരികള് വീണ്ടും എത്തി തുടങ്ങി. ഇതോടെ കൊറോണയെ തുടര്ന്ന് മാസങ്ങളായി നിര്ത്തി വെച്ചിരിക്കുന്ന ബോട്ടിംഗ് ഭൂതത്താന്കെട്ടില് പുനരാരംഭിച്ചു. മാനദണ്ഡങ്ങള് പാലിച്ച് രാവിലെ എട്ട് മുതല് വൈകിട്ട് അഞ്ചു വരെയാണ് ബോട്ട് യാത്ര. ചെറുതും വലുതുമായ പത്തോളം ബോട്ടുകളാണ് സര്വീസ് ആരംഭിച്ചിരിക്കുന്നത്.
തിരക്കുകള്ക്കിടയില് നിന്നും മാറി നില്ക്കാന് ആഗ്രഹിക്കാത്തവര് കുറവാണ്. വിനോദസഞ്ചാരത്തിനായി നാം തിരഞ്ഞെടുക്കുന്നത് എപ്പോഴും ദൂരെയുള്ള സ്ഥലങ്ങളായിരിക്കും. എന്നാല് നഗരത്തിലെ തിരക്കുകളില് നിന്നും മാറി പ്രകൃതിയോട് അടുത്തു നില്ക്കുന്ന ശുദ്ധവായു ശ്വസിക്കാന് സാധിക്കുന്ന നിരവധി സ്ഥലങ്ങള് നമുക്ക് ചുറ്റും തന്നെയുണ്ട്. അത്തരത്തില് ഒന്നാണ് എറണാകുളം ജില്ലയില് കോതമംഗലം താലൂക്കിലെ പിണ്ടിമന ഗ്രാമപഞ്ചായത്തിലെ ഭൂതത്താന് കെട്ട്. കുടുംബത്തോടൊപ്പം കുറച്ച് സമയം ചെലവഴിക്കാന് പറ്റിയ നല്ലൊരു സ്ഥലമാണ് ഇവിടം.
കുട്ടമ്പുഴ പ്രദേശത്ത് നിന്ന് വരുന്ന പൂയംകുട്ടിപുഴയും ഇടമലയാറും കൂടിച്ചേര്ന്ന പെരിയാറിന്റെ കൈവഴിയും ചാരുപാറ ഇഞ്ചത്തൊട്ടി പ്രദേശത്ത് നിന്ന് വരുന്ന പെരിയാറും തട്ടേക്കാട് പ്രദേശത്ത് കൂടിച്ചേര്ന്നതിനുശേഷമാണ് ഭൂതത്താന് കെട്ട്. ബോട്ടിംഗ്, ഫോറസ്റ്റ് ട്രെക്കിംഗ്, വാച്ച് ടവര്, കുട്ടികള്ക്കായുളള പാര്ക്ക് തുടങ്ങി നിരവധി സൗകര്യങ്ങള് സഞ്ചാരികള്ക്കായി ഇവിടെ ഒരുക്കിയിട്ടുണ്ട്.
Comments