ഇസ്ലാമാബാദ്: അന്താരാഷ്ട്ര ക്രിക്കറ്റ് കരിയര് അവസാനിപ്പിക്കുകയാണെന്ന് പാകിസ്താന് പേസ് ബൗളര് മുഹമ്മദ് ആമിര്. താന് കടുത്ത മാനസിക സമ്മര്ദ്ദം അനുഭവിക്കുകയാണെന്നും അതിനാല് ഇനി പാകിസ്താന് വേണ്ടി കളിക്കില്ലെന്നും ആമിര് അറിയിച്ചു. ഫ്രാഞ്ചൈസി ലീഗുകളില് കളി തുടരാനാണ് താരത്തിന്റെ തീരുമാനം.
‘ഒരിക്കലും ഞാന് ക്രിക്കറ്റില് നിന്നും വഴിമാറിപ്പോവുകയല്ല. ഇവിടെയുള്ള സാഹചര്യം മോശമാണ്. ഞാന് പാര്ശ്വവത്ക്കരിക്കപ്പെടുന്നു. 35 അംഗ ടീമില് പോലും എനിക്ക് ഇടം തരുന്നില്ല. അങ്ങനെ ഒഴിവാക്കപ്പെടുന്ന സാഹചര്യമുണ്ടായാല് ഒരു തീരുമാനം എടുക്കാന് സമയമായി എന്നാണ് അര്ത്ഥം. മാനസികമായി പീഡിപ്പിക്കപ്പെടുകയാണ്. എനിക്ക് അത് താങ്ങാന് കഴിയുന്നതല്ല’. ആമിര് പറഞ്ഞു.
നിലവിലെ പാക് ക്രിക്കറ്റ് ബോര്ഡിന് കീഴില് കളിക്കാന് കഴിയുമെന്ന് കരുതുന്നില്ലെന്നും അതിനാല് കളി ഉപേക്ഷിക്കാന് തീരുമാനിച്ചെന്നും ആമിര് വ്യക്തമാക്കി. എല്ലാവര്ക്കും സ്വന്തം രാജ്യത്തിനായി കളിക്കണമെന്നാണ് ആഗ്രഹം. എന്നാല് താന് മറ്റ് ലീഗുകള്ക്കായാണ് ജീവിക്കുന്നതെന്ന് പോലും ആരോപണമുയരുന്നു. അങ്ങനെയെങ്കില് ഇനി പാകിസ്താന് വേണ്ടി കളിക്കില്ല. രണ്ട് ദിവസത്തിനുള്ളില് പ്രസ്താവന പുറത്തിറക്കുമെന്നും ആമിര് വ്യക്തമാക്കി.
2009ല് ട്വന്റി20 മത്സരത്തിലൂടെയായിരുന്നു ആമിറിന്റെ അരങ്ങേറ്റം. ഇതേവര്ഷം ട്വന്റി20 ലോകകപ്പ് നേടിയ ടീമില് ആമിര് അംഗമായിരുന്നു. തുടര്ന്ന് ഒത്തുകളി വിവാദത്തില്പ്പെട്ട താരത്തിന് 5 വര്ഷം വിലക്ക് നേരിടേണ്ടി വന്നു. 2015ല് ടീമില് തിരിച്ചെത്തിയ ആമിര് ഗംഭീര പ്രകടനമാണ് പുറത്തെടുത്തത്. പാകിസ്താന് വേണ്ടി 30 ടെസ്റ്റ് മത്സരങ്ങളും 61 ഏകദിനങ്ങളും 50 ട്വന്റി20 മത്സരങ്ങളും ആമിര് കളിച്ചിട്ടുണ്ട്.
