കൊച്ചി: മകളുടെ ജന്മദിനത്തിൽ വൈകാരികമായ കുറിപ്പ് പങ്കുവച്ച് ഗായിക കെഎസ് ചിത്ര. ഗായികയുടെ കുറിപ്പ് ആരാധകരെ കണ്ണീരണിയിക്കുകയാണ്. ഒരു ദിവസം ഞങ്ങളും ഭൂമിയിൽ നിന്ന് വേർപെട്ട് മകൾക്കരികിൽ എത്തുമെന്നും അവിടെ വച്ച് മൂന്നുപേരും വീണ്ടും ഒരുമിച്ച് ചേരുമെന്നും ചിത്ര ഫേസ്ബുക്കിൽ കുറിക്കുന്നു.
ചിത്രയുടെ കുറിപ്പ് ഇങ്ങനെ, ‘ ആഴത്തിലേറ്റ മുറിവുകൾ കാലത്തിന് ഉണക്കാനാകില്ല. ഇത് ദൈവത്തിന്റെ തീരുമാനവുമായിരുന്നില്ല. ആ വേർപാട് യഥാർത്ഥത്തിൽ ഞങ്ങൾക്ക് എത്രത്തോളം നഷ്ടങ്ങളും വേദനയും ഉണ്ടാക്കുമെന്ന് ദൈവത്തിന് അറിയാമായിരുന്നെങ്കിൽ ഞങ്ങളുടെ പ്രിയ നന്ദന മോൾ ഇപ്പോഴും ഞങ്ങളുടെ കൂടെ ഉണ്ടാകുമായിരുന്നു. ഈ ദുഖം എക്കാലത്തും ഞങ്ങൾക്ക് നൊമ്പരമാണ്. ഞങ്ങളെ രണ്ടാളെയും ദൈവം അങ്ങോട്ട് വിളിച്ച് കഴിയുമ്പോൾ ഞങ്ങൾ മൂന്ന് പേരും വീണ്ടും ഒരുമിച്ച് ചേരും. എന്റെ മോൾ നന്ദനയ്ക്ക് ഒത്തിരി പിറന്നാൾ ആശംസകൾ’ ചിത്ര കുറിച്ചു.
വർഷങ്ങൾ നീണ്ട കാത്തിരിപ്പിനൊടുവിൽ 2002ലാണ് ചിത്രക്കും ഭർത്താവ് വിജയശങ്കറിന് മകൾ പിറന്നത്. എന്നാൽ ഇരുവരുടേയും സന്തോഷങ്ങളും ആഘോഷങ്ങളും ഏറെ നീണ്ടുനിന്നില്ല. 2011 ഏപ്രിൽ 11ന് ദുബായിലെ വീട്ടിലെ നീന്തൽക്കുളത്തിൽ വീണ് മകൾ മരണപ്പെടുകയായിരുന്നു.
Posted by K S Chithra on Thursday, December 17, 2020
