ബെയ്ജിംഗ്: ചൈനയില്‍ നിന്നുളള ഇ കൊമേഴ്‌സ് കമ്പനിയായ ആലിബാബ ഗ്രൂപ്പിനെതിരെ അന്വേഷണത്തിന് ഉത്തരവിട്ട് ചൈന സര്‍ക്കാര്‍. കമ്പനി കുത്തക നയങ്ങളിലേക്ക് നീങ്ങുന്നതായി വിവരങ്ങള്‍ ലഭിച്ചതിനെത്തുടര്‍ന്നാണ് അന്വേഷണം. ചൈനയുടെ സ്റ്റേറ്റ് അഡ്മിനിസ്ട്രേഷന്‍ ഫോര്‍ മാര്‍ക്കറ്റ് റഗുലേഷന്‍(എസ്എഎംആര്‍) ആണ് അന്വേഷണം ആരംഭിച്ചത്.
കമ്പനിയുടെ എക്‌സ്‌ക്ലൂസീവ് ഡീലിങ് എഗ്രിമെന്റ് ഉള്‍പ്പെടെയുളള നയങ്ങളാണ് പരിശോധിക്കുന്നത്. ചൈനയുടെ ഔദ്യോഗിക വാര്‍ത്താ ഏജന്‍സിയായ സിന്‍ഹുവയാണ് ഇക്കാര്യം പുറത്തുവിട്ടത്. വിപണിയിലെ ആലിബാബയുടെ ഇടപെടലാണ് പ്രധാനമായും പരിശോധിക്കുക. അന്വേഷണ വിവരം പുറത്തറിഞ്ഞതോടെ അലിബാബയില്‍ നിക്ഷേപം നടത്തിയ കമ്പനികള്‍ പരിഭ്രാന്തിയിലായിരിക്കുകയാണ്. ഈ കമ്പനികളുടെ ഓഹരിവിലയിലും വന്‍തോതില്‍ ഇടിവുണ്ടായി.
ലോകത്തിലെ ഏറ്റവും വലിയ ഇ കൊമേഴ്‌സ് കമ്പനികളില്‍ ഒന്നാണ് ആലിബാബ. ഇന്ത്യയില്‍ പേടിഎം ഉള്‍പ്പെടെയുളള കമ്പനികളില്‍ ആലിബാബയ്ക്ക് നിക്ഷേപമുണ്ട്. ചൈനയുടെ കര്‍ശന നിയന്ത്രണങ്ങള്‍ക്കും നിയമങ്ങള്‍ക്കും ഉളളില്‍ നിന്നായിരുന്നു ആലിബാബയുടെ വളര്‍ച്ച. കമ്പനിയുടെ സ്ഥാപകന്‍ ജാക് മാ ആഗോളതലത്തില്‍ അംഗീകരിക്കപ്പെടുന്ന ബിസിനസ് ലീഡറാണ്. ആലിബാബ ഡോട്ട് കോം ഉള്‍പ്പെടെയുളള ഇ കൊമേഴ്‌സ് പ്ലാറ്റ്‌ഫോമുകളിലൂടെ ലക്ഷക്കണക്കിന് ഉപഭോക്താക്കളാണ് കമ്പനിക്കുളളത്.
അന്വേഷണത്തിന്റെ ഭാഗമായി ആലിബാബയുടെ അനുബന്ധ കമ്പനിയായ ആന്റ് ഗ്രൂപ്പില്‍ നിന്ന് വിവരങ്ങള്‍ ശേഖരിച്ചു തുടങ്ങിയിട്ടുണ്ട്. ചൈനയുടെ ബാങ്കിംഗ് റെഗുലേറ്ററി സ്ഥാപനമായ പീപ്പിള്‍സ് ബാങ്ക് ഓഫ് ചൈനയും ചൈന സെക്യൂരിറ്റി റെഗുലേറ്ററി കമ്മീഷനും കമ്പനിയെ സമീപിച്ചുകഴിഞ്ഞു. അന്വേഷണങ്ങളുമായി സഹകരിക്കുമെന്ന് കമ്പനി വ്യക്തമാക്കി. ഇത് ബിസിനസിനെ ബാധിച്ചിട്ടില്ലെന്നും വിശദീകരിച്ചു. നിരവധി ആളുകള്‍ക്ക് തൊഴിലവസരങ്ങള്‍ നല്‍കുകയും കമ്പനിയിലുള്ള നിക്ഷേപങ്ങള്‍ വര്‍ദ്ധിക്കുകയും ചെയ്തതോടെയാണ് കമ്യൂണിസ്റ്റ് പാര്‍ട്ടി ഓഫ് ചൈന അന്വേഷണത്തിന് നിര്‍ദ്ദേശം നല്‍കിയത്. കമ്പനിയുടെ കുത്തക സ്വഭാവം വര്‍ദ്ധിച്ചാല്‍ അത് മറ്റ് കമ്പനികളുടെ വളര്‍ച്ചയെ ബാധിക്കുമെന്ന ആശങ്ക ചൂണ്ടിക്കാട്ടിയാണ് നീക്കം.
Comments