ഹാനോയ്: വിയറ്റ്‌നാമിലെ പ്രശസ്ത വിനോദസഞ്ചാര കേന്ദ്രമായ ഫുക്വോക് ദ്വീപിന് സമീപം വിനോദസഞ്ചാരികളെ കൊണ്ടുപോയ സ്പീഡ് ബോട്ട് മുങ്ങിയ സംഭവത്തില്‍ നിരവധി പേരെ കാണാതായി. ബോട്ടിലുണ്ടായിരുന്നവരില്‍ 32 ഇന്ത്യക്കാര്‍ ഉള്‍പ്പെട്ടിരുന്നുവെന്നാണ് പ്രാഥമിക വിവരം. മരണസംഖ്യ സംബന്ധിച്ച് വിവിധ റിപ്പോര്‍ട്ടുകള്‍ പുറത്തുവന്നിട്ടുണ്ടെങ്കിലും ഇന്ത്യന്‍ എംബസി ഇതുവരെ ഔദ്യോഗിക സ്ഥിരീകരണം നല്‍കിയിട്ടില്ല.
ശനിയാഴ്ച രാവിലെ 10.30ഓടെയാണ് അപകടമുണ്ടായത്. വിയറ്റ്‌നാമിന്റെ തെക്കന്‍ തീരത്ത് നിന്ന് ഏകദേശം 45 കിലോമീറ്റര്‍ അകലെ തായ്ലാന്‍ഡ് ഉള്‍ക്കടലില്‍ സഞ്ചരിക്കുകയായിരുന്ന സ്വകാര്യ സ്പീഡ് ബോട്ടാണ് അപകടത്തില്‍പ്പെട്ടത്. മോശം കാലാവസ്ഥയാണോ മറ്റ് സാങ്കേതിക തകരാറുകളാണോ അപകടത്തിന് കാരണമായതെന്ന് വ്യക്തമല്ല.
പ്രാദേശിക മാധ്യമങ്ങള്‍ 15 പേര്‍ മരിച്ചതായി റിപ്പോര്‍ട്ട് ചെയ്യുന്നുണ്ടെങ്കിലും ഇതുസംബന്ധിച്ച് ഔദ്യോഗിക സ്ഥിരീകരണം ലഭിച്ചിട്ടില്ല. രക്ഷാപ്രവര്‍ത്തകര്‍ കാണാതായവര്‍ക്കായി വ്യാപക തെരച്ചില്‍ തുടരുകയാണ്. സംഭവത്തെ തുടര്‍ന്ന് ഇന്ത്യയുടെ ഹോചിമിന്‍ സിറ്റിയിലെ കോണ്‍സുലേറ്റ് അടിയന്തര സഹായത്തിനായി കണ്‍ട്രോള്‍ റൂം പ്രവര്‍ത്തനം ആരംഭിച്ചു. കൂടാതെ ഹാനോയിയിലെ ഇന്ത്യന്‍ എംബസിയും പ്രത്യേക ഹെല്‍പ്ലൈന്‍ സജ്ജമാക്കിയിട്ടുണ്ട്. വിയറ്റ്‌നാമിലെ ഇന്ത്യന്‍ പൗരന്മാര്‍ക്കും ബന്ധുക്കള്‍ക്കും ആവശ്യമായ സഹായം നല്‍കുന്നതിനുള്ള നടപടികള്‍ പുരോഗമിക്കുകയാണെന്ന് അധികൃതര്‍ അറിയിച്ചു.
അടിയന്തര സഹായ നമ്പറുകള്‍:
ഹോചിമിന്‍ സിറ്റി കോണ്‍സുലേറ്റ്
+84 36 281 7930
+84 91 552 37 14
+84 33 452 0414
ഹാനോയ് ഇന്ത്യന്‍ എംബസി
+84 91 308 9165
അപകടത്തില്‍പ്പെട്ടവരുടെ കൃത്യമായ വിവരങ്ങളും മരണ-പരിക്കേറ്റവരുടെ ഔദ്യോഗിക കണക്കും രക്ഷാപ്രവര്‍ത്തനം പുരോഗമിക്കുന്നതിനനുസരിച്ച് പുറത്തുവിടുമെന്ന് വിയറ്റ്‌നാം അധികൃതര്‍ അറിയിച്ചു.
