ബർഗർ എന്ന ആഹാര സാധനം ഇന്ന് കുട്ടികൾക്കും യുവാക്കൾക്കും മാത്രമല്ല പ്രായമായവരും ഏറെ ഇഷ്ടപ്പെടുന്ന ഒന്നാണ്. കൊറോണ വ്യാപനത്തെ തുടർന്ന് ഭക്ഷണ പ്രിയരെല്ലാം ലോക്ക് ഡൗണായപ്പോൾ പണി കിട്ടിയവരിൽ ഹോട്ടലുകളും റെസ്റ്റോറന്റുകളും ബേക്കറികളും ഉൾപ്പെടുന്നു. ഒരു പരിധിക്കപ്പുറം ഓർഡർ ചെയ്ത് വീട്ടിലിരുന്ന് കഴിക്കാനും ആരും തയ്യാറല്ല താനും. അങ്ങനെ ബർഗർ കടകൾക്കും പിസ കടകൾക്കും കൊറോണ വലിയ തിരിച്ചടിയാണ് നൽകിയത്.
ലോക്ക് ഡൗണിന് ഇളവൊക്കെ നൽകി ജനം പുറത്തിറങ്ങിയെങ്കിലും പഴയതു പോലെ ആളും ആരവവുമൊന്നും ബർഗർ കടകളിൽ ഉയരുന്നില്ല. ഇത് മനസ്സിലാക്കിയാണ് കൊളംബിയയിലെ ഒരു ഹോട്ടൽ പുതിയ ഐഡിയയുമായി രംഗത്തെത്തിയത്. കൊറോണക്കാലത്ത് സ്വർണ മാസ്കുകൾ വന്നതു പോലെ പുതിയ ഒരു ഐറ്റമാണ് കൊളംബിയ ബൊഗോട്ടയിലെ റെസ്റ്റോറന്റ് മുന്നോട്ട് വെക്കുന്നത്. സ്വർണം പൂശിയ ബർഗർ !
മെനു കാർഡിൽ ഉൾപ്പെടുത്തിയിട്ടുള്ള സ്വർണം പൂശിയ ബർഗർ വാങ്ങാൻ മുടക്കേണ്ടത് 59 ഡോളറാണ്. സാധാരണ ബർഗറിന് 11 ഡോളർ മാത്രം വിലയുള്ളപ്പോളാണ് പൈസകൂട്ടി വാങ്ങി ആഡംബർ ബർഗർ നൽകാൻ ഹോട്ടലുകാർ തീരുമാനിച്ചത്.
സൂക്ഷിച്ച് ബർഗർ എടുത്തില്ലെങ്കിൽ സ്വർണത്തിന്റെ കാര്യം തീരുമാനമാകും. ശരിയായ രീതിയിൽ എങ്ങനെയാണ് സ്വർണം മാറ്റി ബർഗർ കഴിക്കുന്നതെന്ന് ജീവനക്കാർ പറഞ്ഞു തരും. തെറ്റിപ്പോയാൽ സ്വർണവും പോയി കാശും പോയി. കയ്യിൽ ഒട്ടിപ്പിടിക്കാനും സാദ്ധ്യതയുണ്ടെന്നാണ് ജീവനക്കാർ പറയുന്നത്.
ജനത്തെ ഹോട്ടലുകളിലേക്ക് മടക്കി കൊണ്ടു വരാൻ ഇത്തരം പല ചിത്രപ്പണികളും ചെയ്യുന്നുണ്ടെങ്കിലും പഴയത് പോലെ കാര്യങ്ങൾ ഫലിക്കുന്നില്ല. എങ്കിൽ സ്വർണം കണ്ടെങ്കിലും ആളുകൾ വരട്ടെ എന്നാണ് റെസ്റ്റോറന്റുകാർ ചിന്തിക്കുന്നത്. എത്രത്തോളം വിജയിക്കുമെന്നത് കാത്തിരുന്ന് കാണാം.
ശരീരത്തിന്റെ എത് ഭാഗത്തും ഏത് ഭക്ഷണ പദാർത്ഥത്തിലും എന്തിന് പല്ലുകളിൽ പോലും സ്വർണം ഒട്ടിച്ച് വച്ച് കടത്താൻ ശ്രമിക്കുന്നവരെപ്പറ്റി സ്ഥിരമായി വാർത്തകൾ കാണുന്ന മലയാളിക്ക് ഇത് അത്ര വല്യ അത്ഭുതമൊന്നുമല്ലെന്നത് വേറെ കാര്യം.
Comments