മാഡ്രിഡ്: സ്പാനിഷ് ലീഗിൽ തുടർച്ചയായ ജയങ്ങൾ മാത്രം ലക്ഷ്യമിട്ട് ബാഴ്സലോണ ടീം. എട്ടു ജയങ്ങളുടെ തുടർച്ചയാണ് ലീഗിലെ മൂന്നാം സ്ഥാനക്കാരായ മെസ്സിയും കൂട്ടരും ലക്ഷ്യ മിടുന്നത്. ഇന്നു നടക്കുന്ന പോരാട്ടത്തിൽ ബാഴ്സയുടെ എതിരാളികൾ ഗ്രനാഡയാണ്. ലീഗിൽ ഇത്തവണ കിരീടം ചൂടണമെന്ന റൊണാൾഡ് കോമാന്റെ നിര ജയത്തിൽ കുറഞ്ഞതൊന്നും ആഗ്രഹിക്കുന്നില്ല. തുടർച്ചയായ മൂന്നു ജയമാണ് നിലവിൽ ബാഴ്സ നേടിയിരിക്കുന്നത്.
ലീഗിലെ തുടക്കത്തിൽ കാഡിനോട് 2-1ന് തോറ്റശേഷം ജയങ്ങളും സമനിലകളുമായി ബാഴ്സ ലീഗിലെ പോയിന്റ് നില മെച്ചപ്പെടുത്തിക്കൊണ്ടിരിക്കുകയാണ്. ഇതുവരെ അഞ്ചു ജയങ്ങളും മൂന്ന് സമനിലകളുമാണ് ഞെട്ടിക്കുന്ന തോൽവിക്ക് ശേഷം നേടിയത്. ഏഴാം സ്ഥാനത്തുള്ള ഗ്രനാഡയാണ് എതിരാളി. കഴിഞ്ഞ അഞ്ചു മത്സരങ്ങളിൽ മൂന്ന് ജയം സ്വന്തമാക്കിയതിന്റെ ആത്മവിശ്വാസത്തിലാണ് ഗ്രനാഡ. ആറു മത്സരം കഴിഞ്ഞ ബാഴ്സക്ക് ഇന്ന് ജയം അനിവാര്യമാണ്. ലീഗിൽ മുന്നിലുള്ള അത്ലറ്റികോയുമായി ബാഴ്സക്ക് ഏഴു പോയിൻറുകളുടെ വ്യത്യാസമാണുള്ളത്.
ഗോളടിയിൽ മുന്നേറാനാണ് മെസ്സിയുടെ നോട്ടം. നിലവിൽ ലീഗിൽ 9 ഗോളുകളാണ് നേടിയത്. മൊത്തം അസിസ്റ്റ് അടക്കം 11 ഗോളുകൾക്ക് കളമൊരുക്കി. അത്ലറ്റികോ ബിൽബാവോയെ തോൽപ്പിച്ച മത്സരത്തിൽ ഇരട്ട ഗോളുകൾ നേടിയതോടെ മെസ്സി ആരാധകർ ആവേശത്തിലാണ്.
Comments