ന്യൂഡല്ഹി: കേരള ബ്ലാസ്റ്റേഴ്സ് എഫ്സിയുടെ ഉടമസ്ഥാവകാശത്തില് നിര്ണായക മാറ്റം. നിലവിലെ ഉടമകളായ മാഗ്നം സ്പോര്ട്സ് പ്രൈവറ്റ് ലിമിറ്റഡ് ക്ലബ്ബിന്റെ 100 ശതമാനം ഓഹരികളും വില്ക്കുന്നതിനുള്ള അന്തിമ കരാറില് എത്തിയതായി കേരള ബ്ലാസ്റ്റേഴ്സ് ഔദ്യോഗികമായി അറിയിച്ചു. പുതിയ ഉടമകളുടെ പേര് ക്ലബ് ഔദ്യോഗികമായി പുറത്തുവിട്ടിട്ടില്ല. എന്നാല് ഷാര്ജ രാജകുടുംബാംഗവും വ്യവസായിയുമായ ഷെയ്ഖ് അഹമ്മദ് ബിന് ഫൈസല് അല് ഖാസിമി നയിക്കുന്ന യുഎഇ ആസ്ഥാനമായ കണ്സോര്ഷ്യമാണ് ബ്ലാസ്റ്റേഴ്സിനെ ഏറ്റെടുക്കുന്നതെന്ന് വിവിധ റിപ്പോര്ട്ടുകള് നേരത്തെ സൂചിപ്പിച്ചിരുന്നു. അല് ഫുര്സാന് സ്പോര്ട്സ് ഇന്വെസ്റ്റ്മെന്റിന്റെ പേരും റിപ്പോര്ട്ടുകളില് ഉയര്ന്നുവന്നിട്ടുണ്ട്. എന്നാല് ഇക്കാര്യങ്ങള് കേരള ബ്ലാസ്റ്റേഴ്സ് ഔദ്യോഗികമായി സ്ഥിരീകരിച്ചിട്ടില്ല.
2026-27 സീസണിലുടനീളം ഘട്ടംഘട്ടമായാകും ഉടമസ്ഥാവകാശ കൈമാറ്റം പൂര്ത്തിയാക്കുക എന്ന് ക്ലബ് അറിയിച്ചു. ഈ കാലയളവിലും ക്ലബ്ബിന്റെ പ്രവര്ത്തനങ്ങള്ക്കും പങ്കാളികളോടും ആരാധകരോടുമുള്ള പ്രതിബദ്ധതകള്ക്കും തടസമുണ്ടാകില്ല. പുതിയ ഉടമകള് ഘട്ടംഘട്ടമായി ദൈനംദിന പ്രവര്ത്തനങ്ങളുടെ ചുമതല ഏറ്റെടുക്കും. പുതിയ ഉടമസ്ഥാവകാശ ഗ്രൂപ്പിന്റെ ഔദ്യോഗിക വിവരങ്ങളും തിരിച്ചറിയലും യഥാസമയം പ്രഖ്യാപിക്കുമെന്നും ക്ലബ് വ്യക്തമാക്കി. കേരള ബ്ലാസ്റ്റേഴ്സിനെ സ്വന്തമാക്കാനുള്ള തീരുമാനം എളുപ്പമായിരുന്നില്ലെന്ന് നിലവിലെ ഓഹരിയുടമകള് പ്രതികരിച്ചു. ക്ലബ് രൂപീകരിക്കാനുള്ള ശ്രമത്തില് തുടങ്ങിയ യാത്ര പിന്നീട് പ്രതീക്ഷിച്ചതിനേക്കാള് വലിയ പ്രസ്ഥാനമായി വളര്ന്നെന്നും അവര് പറഞ്ഞു.
അടുത്ത ഘട്ടത്തിലേക്ക് കടക്കുമ്പോള് ക്ലബ്ബിന് ശക്തമായ അടിത്തറ ഒരുക്കിയിട്ടുണ്ടെന്നും ഇന്ത്യന് ഫുട്ബോളില് വരാനിരിക്കുന്ന മാറ്റങ്ങള് ഉള്ക്കൊണ്ട് കൂടുതല് വളരാന് അതിലൂടെ സാധിക്കുമെന്നുമാണ് നിലവിലെ ഉടമകളുടെ പ്രതികരണം. കേരള ബ്ലാസ്റ്റേഴ്സിന്റെ ഉടമസ്ഥാവകാശം കൈമാറാനുള്ള നീക്കം ഏതാനും മാസങ്ങളായി ചര്ച്ചയിലായിരുന്നു. ഓഗസ്റ്റിലും വിദേശ മലയാളി സംരംഭകന് ഉള്പ്പെട്ട കണ്സോര്ഷ്യവുമായി ബന്ധപ്പെട്ട റിപ്പോര്ട്ടുകള് പുറത്തുവന്നിരുന്നു. ഇതിനിടെ പുതിയ ഐഎസ്എല് സീസണിന് മുന്നോടിയായി ബ്ലാസ്റ്റേഴ്സിന്റെ ടീം ഒരുക്കങ്ങളും വൈകിയിരുന്നു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ഉടമസ്ഥാവകാശ കൈമാറ്റ നടപടികളും കളിക്കാരുടെ റിക്രൂട്ട്മെന്റും പൂര്ത്തിയാകാത്തത് പരിശീലന ക്യാമ്പിനെയും ബാധിച്ചതായി റിപ്പോര്ട്ടുകളുണ്ടായിരുന്നു. ബ്ലാസ്റ്റേഴ്സിന്റെ ഉടമസ്ഥാവകാശ മാറ്റം 2026-27 സീസണിലുടനീളം പൂര്ത്തിയാകുന്നതോടെ ഇന്ത്യന് സൂപ്പര് ലീഗിലെ ക്ലബ്ബിന്റെ പുതിയ ഘട്ടത്തിനാണ് തുടക്കമാകുന്നത്.
