മുംബൈ: സയ്യീദ് മുഷ്താഖ് അലി ട്രോഫി ട്വന്റി- 20 ക്രിക്കറ്റില് ശ്രീശാന്തിന്റെ തിരച്ചുവരവ്. കേരളത്തിന് വേണ്ടി ഇറങ്ങിയ ശ്രീ എട്ടാം പന്തില് തന്നെ വിക്കറ്റ് കൊയ്തു. പുതുച്ചേരിയുടെ ഫാബിദ് അഹമ്മദിനെ (10) ക്ലീന് ബൗള് ചെയ്തായിരുന്നു ശ്രീയുടെ വിക്കറ്റ് നേട്ടം.
നാല് ഓവറില് 29 റണ്സ് മാത്രമാണ് ശ്രീശാന്ത് വഴങ്ങിയത്. ഏഴ് വര്ഷത്തെ ഇടവേളയ്ക്ക് ശേഷമാണ് ഔദ്യോഗിക ക്രിക്കറ്റിലേക്ക് ശ്രീശാന്ത് തിരിച്ചെത്തിയത്. അതുകൊണ്ടു തന്നെ ശ്രീശാന്തിന്റെ പ്രകടനം ആരാധകരും ഉറ്റുനോക്കിയിരുന്നു. പന്തിന്റെ വേഗത്തിലും നിയന്ത്രണത്തിലുമൊക്കെ മികവ് കൈവിട്ടിട്ടില്ലെന്ന് തെളിയിക്കുന്നതായിരുന്നു ശ്രീശാന്തിന്റെ പ്രകടനം.
നാല് ഓവറില് 13 റണ്സ് വിട്ടുനല്കി മൂന്ന് വിക്കറ്റുകള് വീഴ്ത്തിയ ജലജ് സക്സേനയും കേരളത്തിന് വേണ്ടി മികച്ച പ്രകടനം നടത്തി. നാല് ഓവറില് 37 റണ്സ് നല്കി ആസിഫും ഒരു വിക്കറ്റ് നേടി. മുംബൈ വാങ്കഡെ സ്റ്റേഡിയത്തില് നടന്ന മത്സരത്തില് ടോസ് നേടിയ പുതുച്ചേരി ബാറ്റിംഗ് തെരഞ്ഞെടുക്കുകയായിരുന്നു. 20 ഓവറില് ആറ് വിക്കറ്റ് നഷ്ടത്തില് പുതുച്ചേരി 138 റണ്സ് നേടി.
2013 ല് രാജസ്ഥാന് റോയല്സിനായി കളിക്കുമ്പോള് ഒത്തുകളി ആരോപണത്തെത്തുടര്ന്ന് അറസ്റ്റിലായതോടെയാണ് ശ്രീശാന്തിന്റെ ക്രിക്കറ്റ് കരിയറിന് ബ്രേക്ക് വന്നത്. ബിസിസിഐ ആജീവനാന്ത വിലക്ക് ഏര്പ്പെടുത്തുകയായിരുന്നു. എന്നാല് വ്യക്തമായ തെളിവ് ലഭിക്കാത്തതിനാല് കോടതി കുറ്റവിമുക്തനാക്കുകയായിരുന്നു. ഇക്കഴിഞ്ഞ സെപ്റ്റംബറിലാണ് വിലക്ക് അവസാനിച്ചത്. തുടര്ന്നാണ് സയ്യീദ് മുഷ്താഖ് അലി ട്രോഫി ട്വന്റി- 20 ടൂര്ണമെന്റിനുളള ടീമില് ശ്രീശാന്തിന് ഇടം നല്കിയത്.
