എറണാകുളം: രവിപുരത്ത് പ്രവർത്തിക്കുന്ന ജാസ്മിൻ ഗ്രാഫിക്സ് എന്ന പ്രിന്റിങ് പ്രസ്സിൽ വൻ തീപിടിത്തം. 30 വർഷത്തിലേറെയായി പ്രവർത്തിക്കുന്ന സ്ഥാപനത്തിന്റെ രണ്ട് നില കെട്ടിടത്തിലെ താഴത്തെ നിലയിലാണ് തീപിടിത്തമുണ്ടായത്.
ഷോർട്ട് സർക്യൂട്ടാണ് അപകടകാരണമെന്നാണ് പ്രാഥമിക നിഗമനം. പ്രിന്റിങ്ങിനായി സൂക്ഷിച്ചിരുന്ന പേപ്പറുകൾക്കും പ്രധാന രേഖകൾക്കുമാണ് ആദ്യം തീപിടിച്ചത്. പേപ്പർ സ്റ്റോക്ക് കൂടുതലായിരുന്നതിനാൽ തീ അതിവേഗം വ്യാപിച്ചതായി അധികൃതർ അറിയിച്ചു.
രാവിലെ പ്രസ്സിലെത്തിയ ഉടമയുടെ മകളാണ് തീ പടരുന്നത് ആദ്യം ശ്രദ്ധിച്ചത്. ഉടൻ തന്നെ അഗ്നിരക്ഷാസേനയെ വിവരം അറിയിക്കുകയായിരുന്നു. വിവരം ലഭിച്ചതിനെ തുടർന്ന് അഞ്ച് യൂണിറ്റ് അഗ്നിരക്ഷാസേന സ്ഥലത്തെത്തി രക്ഷാപ്രവർത്തനം ആരംഭിച്ചു.
ഏകദേശം ഒന്നര മണിക്കൂർ നീണ്ട പരിശ്രമത്തിനൊടുവിലാണ് തീ പൂർണമായും നിയന്ത്രണവിധേയമാക്കാൻ സാധിച്ചത്. സമീപ കെട്ടിടങ്ങളിലേക്ക് തീ പടരാതിരിക്കാൻ രണ്ട് വശങ്ങളിൽ നിന്നുമുള്ള അഗ്നിരക്ഷാസേനയുടെ ഇടപെടൽ നിർണായകമായി.
അടുത്തിടെ എത്തിച്ച ഒരു ലോഡ് പേപ്പർ ഉൾപ്പെടെ സ്റ്റോക്കിലുണ്ടായിരുന്ന ഭൂരിഭാഗം സാമഗ്രികളും പൂർണമായും കത്തിനശിച്ചു. തീപിടിത്തത്തിൽ ലക്ഷക്കണക്കിന് രൂപയുടെ നഷ്ടമുണ്ടായതായി പ്രാഥമിക വിലയിരുത്തൽ. സംഭവത്തിൽ കൂടുതൽ അന്വേഷണം പുരോഗമിക്കുകയാണ്.
