ശ്രീനഗർ: നിശ്ചയദാർഢ്യവും ആത്മാർത്ഥതയുമുണ്ടെങ്കിൽ ഏത് പ്രതികൂല സാഹചര്യവും അതിജീവിച്ച് സ്വന്തം ജോലി നിർവ്വഹിക്കാൻ കഴിയുമെന്ന് പറയാറുണ്ട്. പെരുമഴയത്തും കനത്ത ചൂടിലും മഞ്ഞുവീഴ്ച്ചയിലുമെല്ലാം ജോലി ചെയ്യുന്നവരെ നാം കണ്ടിട്ടുണ്ട്. അത്തരത്തിലുള്ള നിരവധി വീഡിയോകൾ സാമൂഹ്യ മാദ്ധ്യമങ്ങളിൽ പ്രചരിക്കുന്നുണ്ട്. അത്തരത്തിൽ കശ്മീരിൽ നിന്നുള്ള ഒരു വീഡിയോയാണ് ഇപ്പോൾ സാമൂഹ്യ മാദ്ധ്യമങ്ങളിൽ വൈറലാകുന്നത്. ഓർഡർ ചെയ്ത സാധനങ്ങൾ വിതരണം ചെയ്യാനായി കുതിരപ്പുറത്ത് എത്തുന്ന ആമസോൺ ഡെലിവറി ബോയിയാണ് വീഡിയോയിലെ താരം.
അതിശൈത്യമാണ് കശ്മീരിൽ അനുഭവപ്പെടുന്നത്. പലയിടങ്ങളും മഞ്ഞു കൊണ്ട് മൂടി കിടക്കുകയാണ്. കനത്ത മഞ്ഞു വീഴ്ച്ചയെ തുടർന്ന് കശ്മീരിലെ ജനജീവിതം ഏതാണ്ട് നിശ്ചലമായ അവസ്ഥയിലുമാണ്. റോഡുകളും വീടിന്റെ മേൽക്കൂരകളും വൃക്ഷങ്ങളും വാഹനങ്ങളുമെല്ലാം മഞ്ഞു മൂടിക്കിടക്കുകയാണ്.
മിക്കയിടങ്ങളും ഗതാഗതം നിലച്ചിട്ടുണ്ട്. ഈ സാഹചര്യത്തിലാണ് ഓർഡർ ചെയ്ത സാധനം ഉപഭോക്താവിന്റെ പക്കൽ എത്തിക്കാനായി ഡെലിവറി ബോയി കുതിരപ്പുറത്തെത്തിയത്. ഓർഡറുകൾ കൃത്യസമയത്ത് എത്തിക്കാനായുള്ള ഇദ്ദേഹത്തിന്റെ തന്നെ അതിനൂതന കണ്ടുപിടുത്തമാണ് ഈ കുതിര സവാരി.
നിരവധി പേർ ഷെയർ ചെയ്ത വീഡിയോ ഇതിനോടകം തന്നെ സാമൂഹ്യ മാദ്ധ്യമങ്ങളിൽ വൈറലായി കഴിഞ്ഞു. കനത്ത ശൈത്യത്തിലും ഉപഭോക്താക്കളുടെ ആവശ്യം മാനിക്കുന്ന ഡെലിവറി ബോയിയ്ക്കും സഹായിയായ കുതിരയ്ക്കും അഭിനന്ദനങ്ങൾ അറിയിച്ച് നിരവധി പേരാണ് രംഗത്തെത്തുന്നത്.
ആമസോൺ സി ഇ ഒ ജെഫ് ബെസോസിന് തന്നെ വീഡിയോ ടാഗ് ചെയ്തവരുമുണ്ട്. അതേസമയം വീഡിയോ ശ്രദ്ധയിൽപ്പെട്ടതോടെ ആമസോണും പോസ്റ്റിന് മറുപടിയുമായെത്തിയിട്ടുണ്ട്. മഞ്ഞു വീണാലും ആമസോൺ ഡെലിവറി മുടക്കില്ലെന്ന് കമ്പനിയുടെ കസ്റ്റമർ സർവ്വീസ് അക്കൗണ്ട് വീഡിയോയ്ക്ക് താഴെ കമന്റ് ചെയ്തിട്ടുണ്ട്.
Amazon delivery innovation 🐎#Srinagar #Kashmir #snow pic.twitter.com/oeGIBajeQN
— Umar Ganie (@UmarGanie1) January 12, 2021
Comments