ചെന്നൈ: പിറന്നാൾ ആഘോഷത്തിനിടെ വടിവാൾ കൊണ്ട് കേക്ക് മുറിച്ച് വിജയ് സേതുപതി. വാൾ ഉപയോഗിച്ച് വിജയ് സേതുപതി കേക്ക് മുറിക്കുന്നതിന്റെ ചിത്രത്തിന് വിമർശനങ്ങൾ ഉയർന്നതോടെ ആരാധകരോട് മാപ്പ് ചോദിച്ച് താരം രംഗത്തെത്തി. സാമൂഹ്യ മാദ്ധ്യമങ്ങളിൽ ചിത്രം വ്യാപകമായി പ്രചരിച്ചതോടെയാണ് മാപ്പ് പറച്ചിലുമായി താരം എത്തിയത്. ഭാവിയിൽ ഇത്തരം തെറ്റിദ്ധാരണ പരത്തുന്ന കാര്യങ്ങൾ ചെയ്യില്ലെന്ന് വിജയ് സേതുപതി വ്യക്തമാക്കി. ഫേസ്ബുക്ക് കുറിപ്പിലൂടെയായിരുന്നു താരത്തിന്റെ പ്രതികരണം.
സംവിധായകൻ പൊൻറാമിന്റെ നേതൃത്വത്തിൽ മൂന്ന് ദിവസങ്ങൾക്ക് മുൻപാണ് വിജയ് സേതുപതിയുടെ പിറന്നാൾ ആഘോഷം സംഘടിപ്പിച്ചത്. പൊൻറാം സംവിധാനം ചെയ്യുന്ന സിനിമയുടെ ടീമിനൊപ്പമായിരുന്നു പിറന്നാൾ ആഘോഷം. സിനിമയിൽ ഉപയോഗിക്കുന്ന അതേ വാൾ ഉപയോഗിച്ചായിരുന്നു വിജയ് സേതുപതി കേക്ക് മുറിച്ചത്. ചിത്രം സാമൂഹ്യ മാദ്ധ്യമങ്ങളിൽ പ്രചരിച്ചതോടെ വ്യാപക വിമർശനങ്ങൾ ഉയരാൻ തുടങ്ങി. ഇതോടെയാണ് പിറന്നാൾ ദിനമായ ഇന്ന് ക്ഷമാപണവുമായി താരം രംഗത്തെത്തിയത്.
പിറന്നാൾ ദിനത്തിൽ ആശംസകൾ നേർന്ന എല്ലാവർക്കും നന്ദി. മൂന്ന് ദിവസങ്ങൾക്ക് മുൻപ് നടത്തിയ പിറന്നാൾ ആഘോഷം വലിയ വിവാദങ്ങൾക്ക് വഴി വെച്ചിരിക്കുകയാണ്. വടിവാൾ ഉപയോഗിച്ച് കേക്ക് മുറിക്കുന്നതായാണ് പിറന്നാൾ ആഘോഷത്തിന്റെ ചിത്രങ്ങളിൽ കാണുന്നത്. പൊൻറാം സംവിധാനം ചെയ്യുന്ന ചിത്രത്തിലാണ് ഞാൻ അടുത്തതായി അഭിനയിക്കുന്നത്. ഒരു വടിവാൾ ചിത്രത്തിലെ പ്രധാന ഭാഗമാണ്. പൊൻറാമിനും സിനിമയുടെ ടീമിനുമൊപ്പം പിറന്നാൾ ആഘോഷിച്ചതിനാൽ ആ വാൾ ഉപയോഗിച്ചാണ് കേക്ക് മുറിച്ചത്. അങ്ങനെ ചെയ്യേണ്ടിയിരുന്നില്ലെന്ന് ധാരാളം പേർ പറയുകയുണ്ടായി. സംഭവം ആരെയെങ്കിലും വേദനിപ്പിച്ചിട്ടുണ്ടെങ്കിൽ മാപ്പ് പറയുന്നു. ഇനി മുതൽ കൂടുതൽ ശ്രദ്ധാലുവായിരിക്കും. – വിജയ് സേതുപതി ഫേസ്ബുക്കിൽ കുറിച്ചു.
https://www.facebook.com/VijaySethupathi.Official/posts/1877905535701047
