ന്യൂഡൽഹി : കേരള നിയമസഭ തെരഞ്ഞെടുപ്പിൽ യുഡിഎഫിന്റെ പ്രചാരണം മുൻ കേന്ദ്ര പ്രതിരോധ മന്ത്രി എ.കെ ആന്റണി നയിക്കും. കേരള നേതാക്കളും ഹൈക്കമാൻഡും തമ്മിലുള്ള ചർച്ചയിൽ നിന്നാണ് തീരുമാനം. ഇന്ന് രാവിലെ നടന്ന യോഗത്തിലാണ് തീരുമാനമെടുത്തത്.
കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ, മുൻ മുഖ്യമന്ത്രി ഉമ്മൻ ചാണ്ടി , പ്രതിപക്ഷ നേതാവ് രമേശ് ചെന്നിത്തല എന്നി പ്രാർട്ടി പ്രസിഡന്റ് സോണിയ ഗാന്ധി , നേതാക്കളായ രാഹുൽ ഗാന്ധി , താരിഖ് അൻവർ , കെ.സി വേണുഗോപാൽ , എ.കെ ആന്റണി എന്നിവരുമായി നടത്തിയ ചർച്ചയിലാണ് തീരുമാനമെടുത്തത്.ഉമ്മൻ ചാണ്ടിയും രമേശ് ചെന്നിത്തലയും തെരഞ്ഞെടുപ്പിൽ മത്സരിക്കും. ഭൂരിപക്ഷം ലഭിച്ചതിനു ശേഷം യുഡിഎഫ് മുഖ്യമന്ത്രിയെ തെരഞ്ഞെടുക്കുമെന്നും യോഗത്തിൽ തീരുമാനിച്ചിട്ടുണ്ട്.
ആന്റണി പ്രചാരണം നയിക്കുന്നത് കോൺഗ്രസിനു പുത്തനുണർവ്വ് നൽകുമെന്ന് നേതാക്കൾ വ്യക്തമാക്കി. എല്ലാ നേതാക്കളും കൂട്ടായി തെരഞ്ഞെടുപ്പിനെ നേരിട്ട് വിജയത്തിലേക്കെത്തണമെന്നാണ് ഹൈക്കമാൻഡ് ആഗ്രഹിക്കുന്നത്. തീരുമാനങ്ങൾ അതിനനുസരിച്ചുള്ളതാണെന്നും നേതാക്കൾ വാർത്താ ഏജൻസികളോട് പറഞ്ഞു.
ഉമ്മൻ ചാണ്ടി ജനമനസ്സ് അറിയുന്ന നേതാവാണെന്നും പ്രചാരണം നയിക്കാൻ ആന്റണിയും കൂടി ചേരുമ്പോൾ യുഡിഎഫിനു വിജയം വരിക്കാൻ കഴിയുമെന്നും മുസ്ലിം ലീഗ് നേതാക്കളും അഭിപ്രായപ്പെട്ടു. ആന്റണിയുടെ സംശുദ്ധ വ്യക്തിത്വം അഴിമതിയിലും കെടുകാര്യസ്ഥതയിലും മൂടിയ ഇടതുമുന്നണിയെ പുറത്താക്കുന്നതിൽ നിർണായക പങ്കു വഹിക്കുമെന്നും ലീഗ് നേതാക്കൾ കൂട്ടിച്ചേർത്തു. അതേസമയം പാർലമെന്റ് ബജറ്റ് സമ്മേളനത്തിനു ശേഷം കേരളത്തിലേക്കെത്തി മുഴുവൻ സമയ പ്രചാരണത്തിൽ പങ്കാളിയാകുമെന്ന് എകെ ആന്റണിയും വ്യക്തമാക്കി.
