ഐസ്ക്രീമുകളുടേയും കേക്കുകളുടേയും മുകളില് അലങ്കരിക്കാന് ഉപയോഗിക്കുന്ന ഒന്നാണ് ടൂട്ടി ഫ്രൂട്ടി. എന്നാല് കടകളില് നിന്നും വാങ്ങുന്നതിനേക്കാള് വളരെ സ്വാദിഷ്ടവും ആരോഗ്യവുമായ ടൂട്ടി ഫ്രൂട്ടി നമുക്ക് വീട്ടില് തന്നെ ഉണ്ടാക്കിയെടുക്കാന് സാധിക്കുന്നതാണ്. ഇതിനായി ആദ്യം പച്ചപപ്പായ എടുത്തു നന്നായി തൊലി കളഞ്ഞ് അതിനുള്ളിലെ കുരുക്കളും അതിനോട് ചേര്ന്ന ഭാഗവും നന്നായി മുറിച്ച് ഒഴിവാക്കുക. ശേഷം അവ വളരെ ചെറിയ കഷ്ണങ്ങളായി അരിഞ്ഞെടുക്കുക. പിന്നീട് ഒരു പാത്രത്തില് വെള്ളം അടുപ്പില് വെക്കുക. വെളളം നന്നായി തിളച്ചു വരുമ്പോള് അതിലേക്ക് പപ്പായ കഷ്ണങ്ങള് ഇട്ടു കൊടുക്കുക.
ഇവ നന്നായി ഇളക്കിയ ശേഷം അടച്ചു വെച്ച് വേവിക്കുക. ഒരു മുക്കാല് വേവായി വരുമ്പോള് തീ ഓഫ് ചെയ്ത് വെളളത്തില് നിന്ന് ഊറ്റി വയ്ക്കുക. പിന്നീട് മുക്കാല് കപ്പ് പഞ്ചസാര എടുത്ത് അത് ചൂടാക്കി ലായനി തയ്യാറാക്കുക. അതിനു ശേഷം ഇതിലേക്ക് മാറ്റി വെച്ചിരിക്കുന്ന പപ്പായ കഷ്ണങ്ങള് ഇട്ടു കൊടുക്കുക. എന്നിട്ട് ഇരുപത് മിനിറ്റോളം ഇവ നന്നായി കുറുക്കിയെടുക്കുക. അതിനു ശേഷം അവ മൂന്നു കപ്പുകളിലാക്കി പന്ത്രണ്ട് മണിക്കൂര് മാറ്റി വെയ്ക്കുക. അതിനുശേഷം അതിലേക്ക് വ്യത്യസ്ത കളറുകള് ചേര്ത്തു കൊടുത്ത ശേഷം നന്നായി ഇളക്കി യോജിപ്പിക്കുക.
എന്നാല് മാത്രമേ കളറുകള് അതുമായി ചേര്ന്നു പിടിക്കുകയുളളൂ. പിന്നീട് അവ ഓരോന്നും എടുത്ത് ടിഷ്യു പേപ്പറില് നിരത്തി വയ്ക്കുക. ഇവയിലുളള പഞ്ചസാര ലായിനി വലിച്ചെടുക്കുന്നതിനു വേണ്ടിയാണ് ടിഷ്യു പേപ്പറില് നിരത്തി ഇടുന്നത്. ശേഷം ഇത് വെയിലത്ത് വെച്ച് നന്നായി ഉണക്കിയെടക്കുക. വളരെ സ്വാദിഷ്ടവും ആരോഗ്യകരമായ ടൂട്ടി ഫ്രൂട്ടി തയ്യാറായി കഴിഞ്ഞു. ഇനി കടയില് നിന്ന് വാങ്ങേണ്ടതില്ല. എളുപ്പം വീട്ടില് തന്നെ എളുപ്പം തയ്യാറാക്കാം.
Comments