ന്യൂഡൽഹി : ഇന്ത്യയുടെ സാമ്പത്തിക രംഗത്ത് വൻ കുതിപ്പുണ്ടാകുമെന്ന് ഐ.എം.എഫ് റിപ്പോർട്ട്. കൊറോണ ലോക്ഡൗണിനെ തുടർന്ന് മൈനസ് എട്ട് ശതമാനത്തിലേക്ക് കൂപ്പുകുത്തിയ രാജ്യത്തിന്റെ ജിഡിപി നിരക്ക് കുതിച്ചുയരുമെന്ന് ഐ.എം.എഫ് വേൾഡ് എക്കണോമിക്ക് ഔട്ട്ലുക്ക് ഗ്രോത്ത് പ്രൊജക്ഷൻ റിപ്പോർട്ട് വ്യക്തമാക്കുന്നു. ജനുവരിയിൽ പുറത്തുവന്ന ഏറ്റവും പുതിയ റിപ്പോർട്ടിലാണ് ഇന്ത്യയുടെ സാമ്പത്തിക കുതിപ്പ് പ്രവചിക്കുന്നത്.
2020 ൽ മൈനസ് എട്ട് ശതമാനത്തിലേക്ക് താഴ്ന്ന ജിഡിപി വളർച്ച നിരക്ക് ഐ.എം.എഫ് പ്രവചനം അനുസരിച്ച് 2021 ൽ 11 ശതമാനത്തിലേക്ക് കുതിച്ചുയരും. ലോക രാജ്യങ്ങളിൽ ഏറ്റവും മികച്ച വളർച്ച നിരക്കാണിത്.ചൈന 2.3 ശതമാനത്തിൽ നിന്ന് 8.3 ശതമാനത്തിലേക്ക് വളർച്ച നിരക്ക് എത്തിക്കും.ലോക രാജ്യങ്ങളെല്ലാം തിരിച്ചു വരവിന്റെ പാതയിലാണെന്നും റിപ്പോർട്ട് ചൂണ്ടിക്കാട്ടുന്നു.
2022 ലും ഏറ്റവും വേഗത്തിൽ വളരുന്ന സാമ്പത്തിക ശക്തിയായി ഇന്ത്യ തുടരും. 6.8 ശതമാനമായാണ് ഇന്ത്യയുടെ വളർച്ച നിരക്ക് പ്രവചിക്കുന്നത്. ചൈന 5.6 ശതമാനം വളർച്ച നിരക്ക് രേഖപ്പെടുത്തുന്നു. അമേരിക്ക 2.5 ശതമാനം വളർച്ച നിരക്കാണ് നേടുന്നതെന്നും റിപ്പോർട്ട് പറയുന്നു. പ്രതീക്ഷിക്കാത്ത തിരിച്ചു വരവാണ് ഇന്ത്യ നേടുന്നതെന്നും ഐ.എം.എഫ് വ്യക്തമാക്കുന്നു.
