മെൽബൺ: ഓസ്ട്രേലിയൻ ഓപ്പൺ പുരുഷവിഭാഗത്തിൽ നൊവാക് ജോക്കോവിച്ചിനും നദാലിനും ജയം. ഫ്രാൻസിന്റെ ജെർമീ ചാർഡിയെ എതിരില്ലാത്ത മൂന്ന് സെറ്റുകൾക്കാണ് ജോക്ക്കോവിച്ച് തോൽപ്പിച്ചത്. 6-3, 6-1, 6-2നാണ് സെർബിയൻ താരത്തിന്റെ ജയം. നദാൽ തോൽപ്പിച്ചത് ജോക്കോവിച്ചിന്റെ തന്നെ നാട്ടുകാരനായ ലാസ്ലോ ഡെറേയിനെയാണ്. 6-3, 6-4, 6-1നാണ് സ്പാനിഷ് ലോക രണ്ടാം നമ്പർ മറികടന്നത്. തന്റെ 21-ാം ഗ്രാൻഡ്സ്ലാം കിരീട നേട്ടമാണ് റഫ ലക്ഷ്യമിടുന്നത്.
പുരുഷവിഭാഗത്തിലെ മറ്റ് മത്സരങ്ങളിൽ ഓസ്ട്രിയൻ താരം ഡോമിനിക് തീം, ഡാനിയൽ മെഡ്വെഡേവ്, ജർമ്മൻ താരം അലക്സാണ്ടർ സ്വരേവ്, ഓസ്ട്രേലിയയുടെ നിക് കിർഗിയോസ് എന്നിവരും ജയം നേടി. ഇതിനിടെ ഫ്രഞ്ച് കരുത്തനായ ഗയിൽ മോൺഫിൽസ് അട്ടിമറിക്കപ്പെട്ടു.
ഡോമിനിക് തീം 7-6,6-2,6-3ന് കസാഖിസ്താന്റെ മിഖായേൽ കുകുഷ്ക്കിനെ തോൽപ്പിച്ചു. മെഡ് മെഡേവ് സ്വന്തം നാട്ടുകാരനായ ആന്ദ്രേ റൂബലേവിനെയാണ് തോൽപ്പിച്ചത്. അലക്സാണ്ടർ സ്വരേവ് അമേരിക്കയുടെ മാർക്കോസ് ഗൈറോണിനെ 6-7,7-6,6-3,6-2ന് കീഴടക്കിയപ്പോൾ നിക് കിർഗിയോസ് 6-4,6-4,6-4ന് പോർച്ചുഗൽ താരം ഫെഡ്രികോ സിൽവയെ തകർത്തു.
Comments