പാവയ്ക്ക എന്ന് കേള്ക്കുമ്പോള് മിക്ക ആളുകള്ക്കും കഴിക്കാന് മടിയാണ്. കാരണം മറ്റൊന്നുമല്ല പാവയ്ക്കയുടെ കയ്പ് തന്നെ. ഈ കയ്പ് ഇഷ്ടപ്പെടുന്നവരും ഉണ്ട്. എന്നാല് ഇനി കയ്പു കാരണം പാവയ്ക്ക കഴിക്കാന് മടിക്കുന്നവര് ഇത് കഴിച്ചു തുടങ്ങും അത്തരത്തില് സ്വാദിഷ്ടമായ ഒരു വിഭവമാണ് പാവക്ക പച്ചടി. സദ്യയില് ഒഴിച്ചു കൂടാന് പറ്റാത്ത ഒരു വിഭവം കൂടിയാണിത്. വളരെ എളുപ്പത്തില് തയ്യാറാക്കാവുന്ന ഒന്നാണിത്. ഇതു തയ്യാറാക്കുന്നതിനായി ഒരു കപ്പ് നാളികേരം രണ്ട് പച്ചമുളകും കുറച്ച് കടുകും ആവശ്യത്തിന് വെളളം ചേര്ത്ത് നന്നായി അരച്ചെടുക്കുക.
അവ ഒരു പാത്രത്തിലേക്ക് മാറ്റിയതിനു ശേഷം അതിലേയ്ക്ക് അധികം പുളിയില്ലാത്ത തൈര് ചേര്ത്ത് കൊടുക്കുക. ശേഷം ആവശ്യത്തിന് ഉപ്പും ചേര്ത്ത് നന്നായി യോജിപ്പിക്കുക. ഒരു പാവയ്ക്ക എടുത്ത് വട്ടത്തില് കനം കുറച്ച് അരിഞ്ഞ ശേഷം ഉപ്പുപുരട്ടി മാറ്റിവയ്ക്കുക. അഞ്ചു മിനിറ്റിനു ശേഷം പാന് ചൂടാക്കി അതിലേക്ക് രണ്ട് ടേബിള് സ്പൂണ് വെളിച്ചെണ്ണ ഒഴിച്ച് പാവയ്ക്ക നന്നായി വറക്കുക. നന്നായി മൂത്തു വരുമ്പോള് ചൂടോടുകൂടി നേരത്തെ തയ്യാറാക്കി വെച്ചിരിക്കുന്ന കൂട്ടിലേയ്ക്ക് ചേര്ത്ത് നന്നായി ഇളക്കി യോജിപ്പിക്കുക.
ശേഷം വീണ്ടും പാന് അടുപ്പത്ത് വെച്ച് ഒരു ടേബിള് സണ് എണ്ണ ഒഴിച്ച് അതിലേക്ക് കാല് ടീസ്പൂണ് കടുകും വറ്റല്മുളകും ആവശ്യത്തിന് കറിവേപ്പിലയും ചേര്ത്ത് നന്നായി മൂപ്പിച്ച ശേഷം നേരത്തെ തയ്യാറാക്കി വച്ചിരിക്കുന്ന കൂട്ടിലേയ്ക്ക് ഒഴിച്ചു കൊടുക്കുക. വളരെ സ്വാദിഷ്ടമായ പാവയ്ക്ക പച്ചടി തയ്യാര്. കയ്പ് കാരണം കുട്ടികള് ഉള്പ്പെടെ മിക്ക ആളുകളും മാറ്റി നിര്ത്തുന്ന ഒന്നാണ് പാവയ്ക്ക. എന്നാല് ഇതിന്റെ ഗുണങ്ങള് ആകട്ടെ ആരോഗ്യത്തിന് ഏറെ ഫലപ്രദമാണ്. എന്നാല് പാവയ്ക്ക പച്ചടി ഉണ്ടാക്കിയാല് കുട്ടികള് ഉള്പ്പെടെ എല്ലാവരും സ്വാദോടെ കഴിയ്ക്കും എന്ന കാര്യത്തില് സംശയമില്ല.
