ഒരു രഹസ്യം, ഒരു ദിവസം, പലതും സംഭവിക്കാം; കുടുംബത്തെ സംരക്ഷിക്കാൻ ജോർജ് കുട്ടി ഏതറ്റംവരെ പോകുമെന്ന് നാളെ അറിയാം

ഒരു രഹസ്യം.. ഒരു ദിവസം… പലതും സംഭവിക്കാം.. തന്റെ കുടുംബത്തെ രക്ഷിക്കാൻ ജോർജ് കുട്ടി ഏതറ്റം വരെ പോകുമെന്ന് നാളെ അറിയാം. ആരാധകർ ഏറെ ആകാംക്ഷയോടെ കാത്തിരുന്ന മോഹൻലാൽ ജീത്തു ജോസഫ് ചിത്രം ‘ദൃശ്യം 2’ നാളെ ആമസോൺ പ്രൈമിൽ റിലീസിനെത്തും. ഇന്ന് രാത്രി എല്ലാ രഹസ്യങ്ങളും പുറത്താകും എന്ന കുറിപ്പോടുകൂടി ചെറിയൊരു വീഡിയോ പങ്കുവച്ചിരിക്കുകയാണ് മോഹൻലാൽ.

മലയാളത്തിലെ ഏറ്റവും വലിയ ഹിറ്റുകളിൽ ഒന്നാണ് 2013 ൽ പുറത്തിറങ്ങിയ ദൃശ്യം. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ദൃശ്യവും, ദൃശ്യം 2 ഉം നിർമിച്ചിരിക്കുന്നത്. മീന, സിദ്ദിഖ്, ആശ ശരത്, മുരളി ഗോപി, അൻസിബ, എസ്തർ, സായികുമാർ, ഗണേഷ് കുമാർ, അഞ്ജലി നായർ, ജോയ് മാത്യു, അനീഷ് ജി. നായർ തുടങ്ങിയവരാണ് പ്രധാന താരങ്ങൾ.

ആദ്യ ഭാഗം പുറത്തിറങ്ങി ഏഴ് വർഷങ്ങൾക്ക് ശേഷമാണ് ദൃശ്യത്തിന്റെ രണ്ടാം ഭാഗം എത്തുന്നത്. ഇതിനിടയിൽ ജോർജുകുട്ടിയുടേയും കുടുംബത്തിന്റേയും ജീവിതത്തിലുണ്ടായ മാറ്റം അടയാളപ്പെടുത്തുന്ന ചിത്രത്തിന്റെ ട്രെയിലർ ആരാധകരുടെ ആകാംഷ വർദ്ധിപ്പിച്ചിട്ടുണ്ട്.

പുതുവർഷദിനത്തിലാണ് സിനിമയുടെ റീലീസ് പ്രഖ്യാപിച്ചത്. ചിത്രത്തിന്റെ ഓണ്‍ലൈന്‍ റിലീസിനെതിരേ ഒരു വിഭാഗം തീയേറ്റർ ഉടമകൾ പ്രതിഷേധവുമായി രംഗത്തെത്തിയിരുന്നു. തീയേറ്റർ തുറക്കുന്നതിന് സർക്കാർ അനുമതി ലഭിച്ചതിനാൽ തീരുമാനം പുനഃപരിശോധിക്കണമെന്നും ആവശ്യമുയർന്നിരുന്നു.