ദൃശ്യം 2 ഉണ്ടാകില്ലെന്ന് ജീത്തു ജോസഫ്: വർഷങ്ങൾക്ക് മുൻപുള്ള പോസ്റ്റ് കുത്തിപ്പൊക്കി ആരാധകർ

ആരാധകർ ആവേശത്തോടെ കാത്തിരുന്ന ചിത്രം ദൃശ്യം 2 മികച്ച പ്രതികരണം നേടി മുന്നേറുകയാണ്. ആദ്യഭാഗത്തിന് തുടർച്ചയായി രണ്ടാം ഭാഗവും പ്രേക്ഷകരെ പൂർണമായി തൃപ്തിപ്പെടുത്തുന്നുവെന്നാണ് സമൂഹമാദ്ധ്യമങ്ങളിലടക്കം പുറത്തുവരുന്ന ആദ്യ പ്രതികരണം. ചിത്രത്തിന്റെ സംവിധായക മികവും മോഹൻലാലിന്റെ അഭിനയ പ്രകടനവും ചിത്രത്തെ മികച്ചതാക്കുന്നു. ഇപ്പോഴിതാ ജീത്തു ജോസഫിന്റെ ഒരു പോസ്റ്റ് സമൂഹമാദ്ധ്യമങ്ങളിൽ ശ്രദ്ധ നേടുകയാണ്.

2017ൽ ജീത്തു ജോസഫ് പങ്കുവച്ച കുറിപ്പ് ഫേസ്ബുക്കിൽ ആരാധകർ കുത്തിപ്പൊക്കുകയാണ്. ‘ദൃശ്യം 2 വരുന്നു എന്ന വാർത്തകൾ അടിസ്ഥാനരഹിതമാണ്… അങ്ങനൊരു ചിത്രം ഇതുവരെ ചർച്ചകളിലില്ല !!!’ എന്നായിരുന്നു ജീത്തു ജോസഫ് പങ്കുവച്ചത്. 2013ൽ റിലീസ് ചെയ്ത ദൃശ്യം മലയാളത്തിലെ എക്കാലത്തെയും മികച്ച ഹിറ്റുകളിലൊന്നായി മാറിയിരുന്നു. 75 കോടി കളക്ഷനും നേടി. അന്ന് മുതൽ തന്നെ ചിത്രത്തിന്റെ രണ്ടാം ഭാഗം വേണമെന്ന് ആരാധകരിൽ നിന്ന് ആവശ്യവും ഉയർന്നിരുന്നു.

രണ്ടാം ഭാഗം വരുന്നുവെന്ന വാർത്തകൾ പ്രചരിച്ചതോടെയാണ് സംവിധായകൻ തന്നെ പ്രതികരണവുമായെത്തിയത്. എന്നാൽ മോഹൻലാലിന്റെ 60-ാം പിറന്നാളിന്റെ തലേന്ന് സർപ്രൈസ് അനൗൺസ്‌മെന്റായി ദൃശ്യം 2 പ്രഖ്യാപിക്കുകയായിരുന്നു. കൊറോണ മാനദണ്ഡങ്ങൾ പാലിച്ച് 60 ദിവസമെടുത്താണ് സിനിമയുടെ ചിത്രീകരണം പൂർത്തിയായത്.

ദൃശ്യം 2ന് ഗംഭീര പ്രതികരണം വന്നതിന് പിന്നാലെ ജീത്തുവിന്റെ പഴയ പോസ്റ്റിന് പിന്നാലെ ആരാധകർ കമന്റുകളുമായെത്തുകയാണ്. ‘ഇങ്ങേർ സംവിധായകൻ ആയത് നന്നായി.. ഇല്ലെങ്കിൽ പോലീസിനെ ചുറ്റിക്കുന്ന പിടി കിട്ടാത്ത ഒരു ക്രിമിനൽ ആയേനെ !!!’, അവസാന നിമിഷം ഇങ്ങനെ പറയരുത്., സൂപ്പർ പടം’ എന്നിങ്ങനെ നിരവധി കമന്റുകളാണ് ഉയരുന്നത്.

മലയാളം തമിഴ് സിനിമാ നിരൂപകരടക്കം ദൃശ്യം 2നെ പ്രശംസിച്ചെത്തുന്നുണ്ട്. ഇത് ആദ്യമായാണ് സൂപ്പർതാര ചിത്രം ഒടിടിയിൽ റിലീസ് ചെയ്യുന്നത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമ്മിച്ചിരിക്കുന്നത്.