തന്റെയുള്ളിലെ അഭിനേത്രിയെ പുറത്തു കൊണ്ടുവരാൻ സഹായിച്ച ദൃശ്യം എന്ന ചിത്രത്തിൽ അവസരം നൽകിയതിന് സംവിധായകൻ ജിത്തു ജോസഫിനും നടൻ മോഹൻലാലിനും നന്ദി അറിയിച്ച് നടി അൻസിബ ഹസൻ. ഫേസ്ബുക്ക് പോസ്റ്റിലൂടെയായിരുന്നു താരത്തിന്റെ പ്രതികരണം.
മികച്ച പ്രകടനം നടത്തണമെന്ന ആഗ്രഹത്തോടെയാണ് ചലച്ചിത്ര മേഖലയിൽ എത്തിയത്. വളരെയധികം പരിശ്രമങ്ങൾക്കും പ്രയാസങ്ങൾക്കും അവഗണനകൾക്കും ഒടുവിൽ ദൃശ്യം എന്ന മികച്ച സിനിമയിൽ പ്രവർത്തിക്കാൻ അവസരം ലഭിച്ചു. സിനിമയിൽ അഭിനയിച്ചവരുടെ പട്ടികയിൽ പേര് ചേർക്കപ്പെട്ടെങ്കിലും അഭിനയ ജീവിതം ഉപേക്ഷിച്ചതിന് ശേഷം വീണ്ടും ഒരവസരം പ്രതീക്ഷിച്ചിരുന്നില്ല. എന്നിലെ നടിയെ പുറത്തു കൊണ്ടുവരാൻ അവസരം നൽകിയ ജിത്തു ജോസഫ് സാറിനും മോഹൻലാലിനും നന്ദി പറയുന്നു. അൻസിബ ഫേസ്ബുക്കിൽ കുറിച്ചു.
തനിക്ക് വേണ്ടിയും തന്റെ ഭാവിയ്ക്ക് വേണ്ടിയും പ്രവർത്തിച്ച എല്ലാ സഹപ്രവർത്തകർക്കും നന്ദി അറിയിക്കുന്നുവെന്നും താരം പറഞ്ഞു. വ്യാഴാഴ്ച്ച രാത്രിയാണ് ദൃശ്യം 2 ആമസോൺ പ്രൈമിൽ റിലീസ് ചെയ്തത്. ആദ്യ ഭാഗം പോലെ തന്നെ ദൃശ്യം 2 വിനേയും പ്രേക്ഷകർ നിറഞ്ഞ മനസോടെയാണ് സ്വീകരിച്ചിരിക്കുന്നത്. സാമൂഹ്യമാദ്ധ്യമങ്ങളിലടക്കം പങ്കുവെയ്ക്കുന്ന കുറിപ്പുകളിൽ നിന്നും ചിത്രത്തിന് മികച്ച പ്രതികരണങ്ങളാണ് ലഭിക്കുന്നത്.
Comments