മലയാളികളുടെ മനസിൽ വിസ്മയം തീർത്ത് വിജയകരമായി ജൈത്രയാത്ര തുടരുകയാണ് മോഹൻലാൽ ചിത്രം ദൃശ്യം 2. ആമസോൺ പ്രൈമിൽ റിലീസ് ചെയ്തിരിക്കുന്ന ചിത്രത്തിന് മികച്ച പ്രതികരണങ്ങളാണ് സിനിമാ പ്രേമികളിൽ നിന്നും ലഭിച്ചു കൊണ്ടിരിക്കുന്നത്.
ചിത്രത്തെ കുറിച്ചുള്ള ഓരോ വാർത്തകളും വിശേഷങ്ങളും സാമൂഹ്യ മാദ്ധ്യമങ്ങളിൽ വലിയ ചർച്ചാ വിഷയം ആകാറുണ്ട്. അത്തരത്തിൽ സിനിമയിൽ കേന്ദ്ര കഥാപാത്രത്തെ അവതരിപ്പിച്ച എസ്തർ മോഹൻലാലിനെ കുറിച്ചും സിനിമാ സെറ്റിലെ വിശേഷങ്ങളെ കുറിച്ചും പങ്കുവെയ്ക്കുന്ന കുറിപ്പാണ് സാമൂഹ്യ മാദ്ധ്യമങ്ങളിൽ ഇപ്പോൾ വൈറലാകുന്നത്. മോഹൻലാലിനൊപ്പമുള്ള ചിത്രങ്ങളും താരം പങ്കുവെച്ചിട്ടുണ്ട്.
ദൃശ്യം 2 ന്റെ സെറ്റിൽ തനിക്ക് ഏറ്റവും പ്രിയപ്പെട്ട വ്യക്തി മോഹൻലാൽ ആണെന്ന് എസ്തർ പറഞ്ഞു. ദൃശ്യം 2 ന്റെ ചിത്രീകരണം ആരംഭിച്ചപ്പോൾ ചെയ്ത് തീർക്കാനുള്ള അസൈൻമെന്റുകളെ കുറിച്ചും എഴുതാനിരിക്കുന്ന പരീക്ഷകളെ കുറിച്ചുമെല്ലാം ആലോചിച്ചും വിഷമിച്ചും ആശങ്കപ്പെട്ടുമായിരുന്നു എന്നും സെറ്റിലെത്തിയിരുന്നത്. എന്നാൽ സെറ്റിലെത്തുമ്പോൾ മനോഹരമായ പുഞ്ചിരിയോടെ ശുഭദിനം നേർന്നു കൊണ്ട് മോഹൻലാൽ അടുത്തെത്തും. എല്ലാ ദിവസങ്ങളും പ്രകാശപൂരിതമാക്കാൻ അത് ധാരാളമായിരുന്നു – എസ്തർ ഇൻസ്റ്റഗ്രാമിൽ കുറിച്ചു.
എന്ത് സംഭവിച്ചാലും തന്നെ കളിയാക്കാനായി അദ്ദേഹം എന്തെങ്കിലും ഒരു കാരണം കണ്ടെത്തുമെന്നും മീനയും അൻസിബയും അദ്ദേഹത്തോടൊപ്പമായിരുന്നുവെന്നും എസ്തർ പറയുന്നു. തമാശകൾക്കപ്പുറം ദൃശ്യം 2 ന്റെ ചിത്രീകരണ സമയം തങ്ങൾക്കൊക്കെ ഏറ്റവും മനോഹരങ്ങളായ ദിവസങ്ങളായിരുന്നു. കൂടെ പ്രവർത്തിക്കാൻ ഏറ്റവും സന്തോഷവാനും തമാശക്കാരനുമായ ഒരാളായതിൽ ഒരുപാട് നന്ദി അറിയിക്കുന്നുവെന്നും ഒത്തിരി സ്നേഹമുണ്ടെന്നും എസ്തർ ഇൻസ്റ്റഗ്രാം കുറിപ്പിലൂടെ വ്യക്തമാക്കി.
Comments