ന്യൂഡൽഹി: മഹാഭാരതം സിനിമയാകുന്നതിൽ വീണ്ടും അനിശ്ചിതത്വം. നടൻ ആമിർ ഖാൻ പ്രൊജക്ടിൽ നിന്നും പിന്മാറിയെന്ന റിപ്പോർട്ടുകളാണ് പുറത്തുവരുന്നത്. സിനിമയിൽ അഭിനയിച്ചാലുണ്ടായേക്കാവുന്ന വിവാദങ്ങൾ ഭയന്നാണ് ആമിർ പിന്മാറിയതെന്നും റിപ്പോർട്ടുകളുണ്ട്.
മഹാഭാരതം സിനിമയാക്കാനുള്ള പദ്ധതിയുണ്ടായിരുന്നെങ്കിലും പിന്നീട് അത് ഒരു വെബ് സീരീസായി പുറത്തിറക്കാനായിരുന്നു തീരുമാനം. എന്നാൽ ആമിർ ഖാൻ പിന്മാറിയതിലൂടെ വെബ് സീരീസും ഉപേക്ഷിച്ചതായാണ് സൂചന. മഹാഭാരതത്തിനായി അഞ്ച് വർഷം മാറ്റിവെക്കേണ്ടിവരുമെന്നും ഇക്കാലയളവിൽ മൂന്ന് സിനിമകൾ ചെയ്യാമെന്നുമാണ് ആമിറുമായി അടുത്ത വൃത്തങ്ങളിൽ നിന്നും ലഭിക്കുന്ന വിശദീകരണം.
വെബ് സീരീസാണെങ്കിൽ ഇതിനായി ആമിർ രണ്ട് വർഷമെങ്കിലും ചെലവഴിക്കേണ്ടതായി വന്നേക്കാം. ഇതും ആമിറിന് വെല്ലുവിളിയാണ് എന്ന തരത്തിലുള്ള പ്രതികരണങ്ങളും ബോളീവുഡിൽ നിന്നും പുറത്തുവരുന്നുണ്ട്. രാജമൗലി ചിത്രമായ മഹാഭാരതത്തിൽ ശ്രീകൃഷ്ണന്റെ വേഷമാണ് ആമിർ ഖാനു വേണ്ടി നിശ്ചയിച്ചിരുന്നത്. എന്നാൽ, അത്തരമൊരു കഥാപാത്രം ചെയ്താലുണ്ടായേക്കാവുന്ന വിവാദങ്ങളും ജനങ്ങൾ സ്വീകരിക്കുമോയെന്ന ഭയവുമാണ് ആമിറിന്റെ പിന്മാറ്റത്തിന് കാരണമായി വിലയിരുത്തപ്പെടുന്നത്.
Comments