ഗോരഖ്പൂര്‍: ദുര്‍ഗാ വിഗ്രഹ നിമജ്ജന ഘോഷയാത്രയ്‌ക്കിടെ ട്രാക്ടര്‍ ട്രോളിയില്‍ ഘടിപ്പിച്ച ഇരുമ്പുദണ്ഡ് ഹൈടെന്‍ഷന്‍ വൈദ്യുതിലൈനില്‍ തട്ടി മൂന്ന് പേര്‍ മരിച്ചു. 10 പേര്‍ക്ക് പൊള്ളലേറ്റു. ഉത്തര്‍പ്രദേശിലെ ഗോരഖ്പൂരില്‍ ബുധനാഴ്ച വൈകിട്ട് അഞ്ചുമണിയോടെയായിരുന്നു അപകടം. ഗുല്‍രിഹ പൊലീസ് സ്റ്റേഷന്‍ പരിധിയിലെ അയോധ്യ പ്രസാദ് ചൗഹാന്‍ ടോളയ്‌ക്ക് സമീപമാണ് സംഭവം. ദുര്‍ഗാ വിഗ്രഹം നിമജ്ജനം ചെയ്യുന്നതിനായി ഭക്തര്‍ ട്രാക്ടര്‍ ട്രോളിയില്‍ യാത്ര ചെയ്യുകയായിരുന്നു. ഇതിനിടെ ട്രോളിയില്‍ ഘടിപ്പിച്ച നീളമുള്ള ഇരുമ്പുദണ്ഡ് മുകളിലൂടെ കടന്നുപോകുന്ന ഹൈടെന്‍ഷന്‍ വൈദ്യുതിലൈനില്‍ തട്ടുകയായിരുന്നു. ഇതോടെ ട്രോളിയിലുണ്ടായിരുന്നവര്‍ക്കു വൈദ്യുതാഘാതമേറ്റു.
പരിക്കേറ്റവരെ ഉടന്‍ ഗോരഖ്പൂരിലെ ബിആര്‍ഡി മെഡിക്കല്‍ കോളജില്‍ പ്രവേശിപ്പിച്ചു. വിവരമറിഞ്ഞ് പൊലീസും ഭരണവകുപ്പ് ഉദ്യോഗസ്ഥരും സ്ഥലത്തെത്തി രക്ഷാപ്രവര്‍ത്തനങ്ങള്‍ ഏകോപിപ്പിച്ചു. ദുര്‍ഗാ വിഗ്രഹ നിമജ്ജനവുമായി ബന്ധപ്പെട്ട് വിവിധ ഇടങ്ങളില്‍ അപകടങ്ങള്‍ റിപ്പോര്‍ട്ട് ചെയ്തിട്ടുണ്ട്. ഫത്തേപൂരിലെ ചക് കടോഘന്‍ ഗ്രാമത്തില്‍ വിഗ്രഹ നിമജ്ജനത്തിന് പിന്നാലെ കുളത്തില്‍ കുളിക്കാനിറങ്ങിയ മൂന്ന് യുവാക്കള്‍ മുങ്ങിമരിച്ചു. രണ്ടുപേരെ രക്ഷപ്പെടുത്തി. ആദിത്യ സാഹു (19), രാജ സാഹു (18), അഭിമന്യു സാഹു (16) എന്നിവരാണ് മരിച്ചത്. ഹര്‍ഷ്, യശ്വന്ത് എന്നിവരെ നാട്ടുകാര്‍ രക്ഷപ്പെടുത്തി. പ്രാഥമിക ചികിത്സയ്‌ക്കുശേഷം ഇവരെ ജില്ലാ ആശുപത്രിയിലേക്ക് മാറ്റി.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ഖുഷിയാരിപുര്‍ പ്രദേശത്ത് സ്ഥാപിച്ച രണ്ട് ദുര്‍ഗാ വിഗ്രഹങ്ങള്‍ സുല്‍ത്താന്‍പുര്‍ പൊലീസ് സ്റ്റേഷന്‍ പരിധിയിലെ നൗബസ്ത ഘട്ടില്‍ നിമജ്ജനം ചെയ്യാനായിരുന്നു തീരുമാനമെന്ന് ഫത്തേപൂര്‍ പൊലീസ് സൂപ്രണ്ട് അഭിമന്യു മംഗ്ലിക് പറഞ്ഞു. എന്നാല്‍ ഭക്തരില്‍ ചിലര്‍ ഒരു വിഗ്രഹം ഗ്രാമത്തിലെ കുളത്തിലെത്തിച്ച് നിമജ്ജനം ചെയ്യുകയായിരുന്നു. നിശ്ചയിച്ചിട്ടുള്ള നിമജ്ജന കേന്ദ്രങ്ങള്‍ മാത്രം ഉപയോഗിക്കണമെന്നും ചടങ്ങുകള്‍ക്കിടെ കുളങ്ങളിലും മറ്റ് ജലാശയങ്ങളിലും ഇറങ്ങി കുളിക്കുന്നത് ഒഴിവാക്കണമെന്നും പൊലീസ് നിര്‍ദേശിച്ചു.
