മമ്മൂട്ടി നായകനായെത്തുന്ന ചിത്രം ദി പ്രീസ്റ്റിന്റെ റിലീസ് വീണ്ടും മാറ്റി. വ്യാഴാഴ്ച്ചയായിരുന്നു ദി പ്രീസ്റ്റ് റിലീസ് ചെയ്യാനിരുന്നത്. ഇത് രണ്ടാം തവണയാണ് പ്രീസ്റ്റിന്റെ റിലീസ് മാറ്റി വെയ്ക്കുന്നത്. നേരത്തെ ഫെബ്രുവരി നാലിന് ആയിരുന്നു റിലീസ് ഡേറ്റ് പ്രഖ്യാപിച്ചിരുന്നത്.
പല വിദേശ രാജ്യങ്ങളിലെയും തിയേറ്ററുകൾ അടഞ്ഞു കിടക്കുന്നതിനാലും കേരളത്തിലെ തിയേറ്ററുകളിൽ ദിവസേന നാലു പ്രദർശനങ്ങൾ നടത്താൻ കഴിയാത്തതിനാലുമാണ് റിലീസ് മാറ്റി വെക്കുന്നതെന്നാണ് അണിയറ പ്രവർത്തകർ അറിയിക്കുന്നത്.
സെക്കൻഡ് ഷോ അനുവദിക്കാതെ കേരളത്തിൽ ചിത്രം റിലീസ് ചെയ്യില്ലെന്ന് സംവിധായകൻ നേരത്തെ അറിയിച്ചിരുന്നു. എന്നാൽ റിലീസ് മാറ്റി വെച്ചെന്ന ഔദ്യോഗിക പ്രഖ്യാപനം അൽപ്പ സമയത്തിന് മുൻപാണ് നടന്നത്.
മമ്മൂട്ടിക്കൊപ്പം മഞ്ജുവാര്യർ നായികയായെത്തുന്ന ആദ്യ ചിത്രമാണ് പ്രീസ്റ്റ്. ഈ മാസം ആദ്യം സെക്കന്റ് ഷോ അനുവദിക്കുമെന്ന പ്രതീക്ഷയിലായിരുന്നു അണിയറ പ്രവർത്തകർ. എന്നാൽ ഇതുവരെ സെക്കൻഡ് ഷോ അനുവദിക്കാത്ത സാഹചര്യത്തിലാണ് റിലീസ് വീണ്ടും നീട്ടാൻ തീരുമാനിച്ചിരിക്കുന്നത്. പുതിയ റിലീസ് തീയതി ഇതുവരെ പ്രഖ്യാപിച്ചിട്ടില്ല. സാഹചര്യം മാറുന്നതിനനുസരിച്ച് പുതിയ പ്രഖ്യാപനം ഉണ്ടാകും.
നവാഗതനായ ജോഫിൻ ടി ചാക്കോയാണ് ദി പ്രീസ്റ്റിന്റെ സംവിധായകൻ. അഖിൽ ജോർജാണ് ചിത്രത്തിന്റെ ഛായാഗ്രാഹകൻ. ആന്റോ ജോസഫ് ഫിലിം കമ്പനിയുടെയും ആർ ഡി ഇല്യൂമിനേഷൻസിന്റേയും ബാനറിൽ ആന്റോ ജോസഫും ബി ഉണ്ണികൃഷ്ണനും ചേർന്ന് നിർമ്മിക്കുന്ന ചിത്രത്തിൽ നിഖിലാ വിമൽ, ശ്രീനാഥ് ഭാസി, സാനിയ ഇയ്യപ്പൻ, ജഗദീഷ്, മധുപാൽ തുടങ്ങിയ താരങ്ങളും പ്രധാന വേഷത്തിൽ എത്തുന്നുണ്ട്.
