അതിപുരാതനമായ നിരവധി ക്ഷേത്രങ്ങളുണ്ട് കേരളത്തില്. എന്നാല് അവയൊന്നും തന്നെ അത്രയധികം അറിയപ്പെടണം എന്നില്ല. അത്തരത്തില് ഒരു ക്ഷേത്രമാണ് കണ്ണൂര് കൂത്തുപറമ്പിന് അടുത്തുള്ള കോട്ടയ്യത്ത് സ്ഥിതി ചെയ്യുന്ന കോട്ടയില് ശ്രീ തൃക്കൈക്കുന്ന് മഹാദേവ ക്ഷേത്രം. വളരെയേറെ ചരിത്ര പ്രാധാന്യമുള്ളതും നിരവധി പ്രത്യേകതകള് നിറഞ്ഞതുമായ ഒരു ക്ഷേത്രമാണിത്. വലുപ്പത്തിന്റെ കാര്യത്തിലും കേരളത്തിലെ മറ്റു ക്ഷേത്രങ്ങളെ അപേക്ഷിച്ച് മുന്പന്തിയില് നില്ക്കുന്ന ഒരു ക്ഷേത്രമാണിത്. ശിവഭഗവാന് ആണ് ക്ഷേത്രത്തിലെ പ്രധാന പ്രതിഷ്ഠ. ഭഗവാന്റെ മഹാദേവന്, പെരുമാള് എന്നീ രണ്ട് ഭാവങ്ങളിലുള്ള പ്രതിഷ്ഠയും ക്ഷേത്രത്തിലുണ്ട്. ക്ഷേത്രത്തിന് മുന്നിലായി വലിയൊരു ചിറയുണ്ട്.
അതിനു ചുറ്റുമായി ആളുകള്ക്ക് നടക്കാന് പറ്റുന്ന തരത്തില് ചെറിയ നടപ്പാതയും തീര്ത്തിട്ടുണ്ട്. പ്രകൃതിയോട് ഏറെ അടുത്തു നില്ക്കുന്ന ഒരു ക്ഷേത്രം കൂടിയാണ് തൃക്കൈക്കുന്ന് മഹാദേവ ക്ഷേത്രം. ഈ അന്തരീക്ഷം വളരെ മനോഹരവും അതിലുപരിയായി മനസ്സിന് വളരെ സംതൃപ്തി നല്കുന്ന ഒരിടം കൂടിയാണ്. ക്ഷേത്രത്തിലെ ഉപപ്രതിഷ്ഠകള് എല്ലാം തന്നെ വളരെ പ്രത്യേകതയുള്ളവയാണ് . അശ്വാരൂഢനായ അയ്യപ്പനാണ് ഒരു പ്രതിഷ്ഠ. യുദ്ധം കഴിഞ്ഞുളള ഭാവത്തില് ഇരിക്കുന്ന അയ്യപ്പനാണിത്. അതുപോലെ തന്നെ പാര്ത്ഥസാരഥിയാണ് മറ്റൊരു പ്രതിഷ്ഠ.
നമ്മെ മുന്നോട്ടു നയിക്കുന്ന ഭഗവാന് ശ്രീകൃഷ്ണനെയാണ് ഇതിലൂടെ കാണുന്നത്. പ്രധാന പ്രതിഷ്ഠയായ മഹാദേവന് അഭിമുഖമായി ദേവിയുടെ പ്രതിഷ്ഠയുമുണ്ട്. കൂടെ നാഗദൈവങ്ങളുടെയും ഗണപതിയുടെയും പ്രതിഷ്ഠയുണ്ട്.വളരെ വിശാലമായ ചുറ്റു മതിലിനുള്ളിലാണ് ക്ഷേത്രം. ക്ഷേത്ര നിര്മ്മിതി വളരെ പ്രത്യേകതകള് നിറഞ്ഞതാണ്. ക്ഷേത്ര മേല്ക്കുരയിലുളള ചിത്രപ്പണികളെല്ലാം തന്നെ വളരെ ഭംഗിയുളളതാണ്. എങ്കിലും കേരളത്തിലെ മറ്റു പ്രധാന ക്ഷേത്രങ്ങളിലെ പോലെ വലിയ തിരക്കും ആള്ക്കൂട്ടവും ബഹളവും ഈ ക്ഷേത്രത്തില് ഇല്ല. ക്ഷേത്രത്തിന്റെ പ്രാധാന്യം കൂടുതല് ആളുകളിലേക്ക് എത്തിയിട്ടില്ല എന്നതുതന്നെ ആവണം അതിന്റെ കാരണം.
Comments