കൊൽക്കത്ത : ബംഗാളിൽ മൂന്നാം ഘട്ട തെരഞ്ഞെടുപ്പിന് മണിക്കൂറുകൾ മാത്രം ബാക്കി നിൽക്കെ ബിജെപി പ്രചാരണത്തിന് നേരെ വീണ്ടും ആക്രമണം. ബിജെപി സ്ഥാനാർത്ഥിയും സിനിമാ താരവുമായ പായേൽ സർക്കാറിന്റെ പ്രചാരണ പരിപാടിയ്ക്ക് നേരെയാണ് ആക്രമണം നടന്നത്. ആക്രമണത്തിൽ നിരവധി പേർക്ക് പരിക്കേറ്റു. സംഘർഷം സൃഷ്ടിച്ചത് തൃണമൂൽ ആണെന്ന് ബിജെപി ആരോപിച്ചു.
ബെഹാലയിലെ തകൂർപുകൂർ പ്രദേശത്താണ് സംഭവം. ബിജെപി സ്ഥാനാർത്ഥിയായ പായൽ സർക്കാറിന്റെ പ്രചാരണ പരിപാടിയ്ക്ക് നേരെയാണ് വ്യാപക അക്രമം അഴിച്ചുവിട്ടത്. സ്ഥാനാർത്ഥിയുടെ ഒപ്പമുണ്ടായിരുന്ന നിരവധി പ്രവർത്തകർക്ക് ആക്രമണത്തിൽ പരിക്കേറ്റു. പരിക്കേറ്റവർക്ക് പ്രാഥമിക ചികിത്സ നൽകുന്ന ചിത്രങ്ങളും സോഷ്യൽമീഡിയയിൽ പ്രചരിക്കുന്നുണ്ട്.
ബംഗാളിൽ എല്ലാ വർഷവും തെരഞ്ഞെടുപ്പ് സമയത്ത് വ്യാപക അക്രമമാണ് നടക്കാറുള്ളത്. ഇത് മുന്നിൽ കണ്ടുകൊണ്ടാണ് കേന്ദ്രം സായുധ സേനയെ വിന്യസിച്ചത്. എന്നാൽ കേന്ദ്ര സേനാംഗങ്ങളുടെ എണ്ണം കുറവുള്ള സ്ഥലങ്ങളിലാണ് തൃണമൂൽ അക്രമം അഴിച്ചുവിടുന്നത്. രണ്ടാം ഘട്ട തെരഞ്ഞെടുപ്പ് നടന്ന സമയത്തും ബിജെപി പ്രവർത്തകർക്ക് നേരെ ആക്രമണം നടന്നിരുന്നു.
