ഗൂഗിളിന്റെയും ഫേസ്ബുക്കിന്റെയും സഹായത്തോടെ ആഗോള പെയ്‌മെന്റ് വിപണിയില്‍ സാന്നിധ്യം ശക്തമാക്കാന്‍ ഒരുങ്ങി റിലയന്‍സും. വിസയ്‌ക്കും മാസ്റ്റര്‍കാര്‍ഡിനും ബദലായി ആണ് ഈ പുതിയ സംവിധാനവുമായി റിലയന്‍സ് എത്തുന്നത്. പേയ്മെന്റ് സേവനങ്ങള്‍ക്കായി ആഗോള ഭീമന്‍മാരുടെ സഹായത്തോടെ പ്രത്യേക ശാഖ രൂപീകരിക്കാനാണ് റിലയന്‍സ് തീരുമാനിച്ചിരിക്കുന്നത്. ഇതിനായി കമ്പനി ആര്‍ബിഐ അനുമതി തേടി. ഇന്‍ഫിബീം അവന്യൂ, ഗൂഗിള്‍, ഫേസ്ബുക്ക് എന്നിവയുമായി സഹകരിച്ച് ഇതിനായി പുതിയ കണ്‍സോര്‍ഷ്യം രൂപീകരിക്കാനാണ് പദ്ധതി.
ആഗോള പെയ്‌മെന്റ് വിപണിയില്‍ റിലയന്‍സിന്റ സാന്നിധ്യം അറിയിക്കാനാണ് ഈ പദ്ധതി. ഓപ്പറേറ്റിംഗ് ലൈസന്‍സ് ലഭിച്ചാല്‍ വിസ, മാസ്റ്റര്‍കാര്‍ഡ് എന്നിവ ആധിത്യം പുലര്‍ത്തുന്ന വിപണിയിലേക്ക് ഉടന്‍ തന്നെ റിലയന്‍സും എത്തും. ജിയോ പേയ്മെന്റ് ബാങ്കിലൂടെ വിദേശത്തും പേയ്മെന്റ് സേവനങ്ങള്‍ ലഭ്യമാക്കാന്‍ പുതിയ കൂട്ടുകെട്ട് സഹായകരമായേക്കും. പെയ്‌മെന്റ് രംഗത്ത് സ്വതന്ത്ര സേവനങ്ങള്‍ ന്‍ല്‍കുന്ന ലാഭ രഹിത സ്ഥാപനമായി ആണ് ന്യൂ അംബര്‍ള എന്റിറ്റികള്‍ രജിസ്റ്റര്‍ ചെയ്യുന്നത്. ഇതിന് ആര്‍ബിഐ അംഗീകാരം വേണം.
ആര്‍ബിഐയുടെ എന്‍യുഐ ലൈസന്‍സിനായി റിലയന്‍സിന് പുറമെ ടാറ്റ ഗ്രൂപ്പ്, ആക്‌സിസ് ബാങ്ക്, ഐസിഐസിഐ ബാങ്ക് എന്നിവയും ഇതിനോടകം അപേക്ഷ നല്‍കിയിട്ടുണ്ട്. ആഗോള കമ്പനികള്‍ക്കൊപ്പം ഫിനാന്‍സ് കമ്പനിയായ ഇന്‍ഫീബീം അവന്യൂസിന്റെ അനുബന്ധ കമ്പനിയായ സോ ഹം ഭാരത്തിനൊപ്പമാണ് റിലയന്‍സ് കൈ കോര്‍ക്കുന്നത്. പുതിയ സംരംഭത്തില്‍ നാല്‍പത് ശതമാനം വിഹിതം റിലയന്‍സിന് ഉണ്ടാകും എന്നാണ് സൂചന. മറ്റ് മൂന്ന് സ്ഥാപനങ്ങള്‍ക്ക് ഇരുപത് ശതമാനം വീതമായിരിക്കും ഓഹരി പങ്കാളിത്തം ഇണ്ടായിരിക്കുക എന്നാണ് വിവിധ റിപ്പോര്‍ട്ടുകള്‍ സൂചിപ്പിക്കുന്നു.
Comments