ശിവനും വിഷ്ണുവും ഒന്നിക്കുന്ന അപൂര്വ്വ ക്ഷേത്രങ്ങളില് ഒന്നാണ് കണ്ണൂര് ജില്ലയില് സ്ഥിതി ചെയ്യുന്ന ഊര്പ്പഴച്ചിക്കാവ്. ശനിദോഷ നിവാരണത്തിന് ഏറ്റവും ഉത്തമമാണ് ഇവിടം. സാധാരണ കാവുകളിലാണ് വെള്ളാട്ട് നടത്താറുള്ളത്. എന്നാല് ഇവിടെ എല്ലാ ദിവസവും വെള്ളാട്ട് നടത്തുന്നു എന്നത് ഈ ക്ഷേത്രത്തിലെ ഏറ്റവും വലിയ പ്രത്യേകത തന്നെയാണ്. വേട്ടക്കൊരുമകനും ദൈവത്താറും തമ്മിലുള്ള സൗഹൃദത്തെ പ്രതിനിധാനം ചെയ്യുന്നതാണ് ഈ ക്ഷേത്രം. ശങ്കരനാരായണ ചൈതന്യമാണ് ഇവിടെ കുടികൊള്ളുന്നത്. വൈദ്യനാഥ സ്വരൂപത്തിലുള്ളതാണ് ഇവിടുത്തെ പ്രതിഷ്ഠ.
പ്രകൃതിയോട് വളരെ ചേര്ന്നു നില്ക്കുന്ന ഈ ക്ഷേത്രം കാഴ്ചയില് ഏറെ ഭംഗിയുള്ളതാണ്. ക്ഷേത്രത്തിനു ചുറ്റും കാവുകളാല് മൂടപ്പെട്ടു കിടക്കുന്നു. അതോടൊപ്പം തന്നെ ക്ഷേത്രത്തോടടുത്തായി രണ്ട് കുളങ്ങളുണ്ട്. ഇതിലൊന്നിലെ വെളളം അമൃതായാണ് പറയപ്പെടുന്നത്. പണ്ട് വില്ലുമംഗല സ്വാമിയാര്ക്ക് കാലിന് വേദന അനുഭവപ്പെട്ടപ്പോള് ക്ഷേത്ര വിളക്കിലെ എണ്ണ തേച്ച് ആ കുളത്തില് കാലു കഴുകിയപ്പോള് വേദന മാറി. അതിനാലാണ് ഈ ക്ഷേത്രത്തിലെ വെള്ളം അമൃത് എന്ന് പറയപ്പെടാന് കാരണം. ഭഗവതി പ്രതിഷ്ഠയും നാഗ പ്രതിഷ്ഠയുമാണ് ക്ഷേത്രത്തിലെ മറ്റു പ്രതിഷ്ഠകള്.
മനസ്സിനും ശരീരത്തിനും ഒരുപോലെ ശാന്തിയും കുളിര്മയും നല്കുന്ന ഒരു അന്തരീക്ഷമാണ് ഈ ക്ഷേത്രം. ഇതിനു ചുറ്റുമായി നിരവധി മരങ്ങളും വള്ളിച്ചെടികളും പടര്ന്നുകിടക്കുന്നു. ഇതു കൂടാതെ രണ്ടു മരങ്ങള് ഒരുമിച്ച് ഒറ്റമരമായി നില്ക്കുന്ന ഏച്ചില് മരം ഈ ക്ഷേത്രത്തിലെ ഒരു അപൂര്വ്വ കാഴ്ചയാണ്. വേട്ടക്കൊരുമകനും ദൈവത്താറും തമ്മിലുള്ള സൗഹൃദത്തിന്റെ പ്രതീകമായാണ് ഈ മരത്തെ കാണുന്നത്. ഊരില് പഴയ ഏച്ചില് കാവ് എന്നത് ലോപിച്ചാണ് ഊര്പ്പഴച്ചിക്കാവ് എന്നായി മാറിയത്. നിരവധി ആളുകളാണ് നിത്യവും ശനിദോഷ നിവാരണത്തിനായി ക്ഷേത്രത്തില് എത്തുന്നത്.
Comments