വ്യത്യസ്തത ഇഷ്ടപ്പെടാത്തവര്‍ ആരാണുള്ളത്. ആളുകള്‍ക്കിടയില്‍ ശ്രദ്ധിക്കപ്പെടണമെന്നും മറ്റുള്ളവരില്‍ നിന്നും വ്യത്യസ്തമായിരിക്കണം എന്ന് ചിന്തിക്കുന്നവര്‍ ഒരുപാടുണ്ട്. അത്തരത്തില്‍ വെറൈറ്റി തേടിപോകുന്നവര്‍ക്കിടയില്‍ ഏറെ ശ്രദ്ധ നേടുകയാണ് അബു സാകൗര്‍. കഴിഞ്ഞ നാല്‍പത് വര്‍ഷങ്ങളായി എല്ലാം മഞ്ഞ മയം. അബു സാകൗര്‍ ഉപയോഗിക്കുന്ന വസ്ത്രങ്ങളും വാച്ചും തൊപ്പിയും ചെരിപ്പും കുടയും വാഹനവും ഉള്‍പ്പെടെ സര്‍വ്വവും മഞ്ഞ നിറത്തിലുള്ളവയാണ്.
അബു സാകൗറിന്റെ മഞ്ഞയോടുള്ള ഈ പ്രണയത്തിന് പിന്നിലുമുണ്ട് രസകരമായ ഒരു കഥ. 1983 മുതലാണ് മഞ്ഞ നിറത്തിലുള്ള വസ്തുക്കള്‍ ഉപയോഗിക്കാന്‍ അബു സാകൗര്‍ ആരംഭിച്ചത്. ‘മഞ്ഞ സന്തോഷത്തിന്റെ നിറമാണെന്നും രാജ്യത്ത് നടക്കുന്ന യുദ്ധങ്ങള്‍ക്കും കലാപങ്ങള്‍ക്കും ഇടയില്‍ സ്വയം സന്തോഷവാനായി ഇരിക്കാന്‍ ആഗ്രഹിക്കുന്നുവെന്നും തന്റെ സന്തോഷം മറ്റുള്ളവരിലേക്കും എത്തിക്കണമെന്നതിനാലുമാണ് മഞ്ഞയോട് ത്ല്‍പര്യം തോന്നി തുടങ്ങിയത്.
എന്നാല്‍ കാഴ്ചക്കാര്‍ക്ക് ഇതൊരു കൗതുകമായിരുന്നു. അദ്ദേഹത്തെ ഏറെ ആശ്ചര്യത്തോടെയാണ് ആളുകള്‍ നോക്കിയിരുന്നത്. എന്നാല്‍ പിന്നീട് അദ്ദേഹത്തിന്റെ ഈ മഞ്ഞയോടുള്ള ഇഷ്ടം കണ്ടറിഞ്ഞ ആളുകള്‍ അദ്ദേഹത്തിനൊപ്പം നിന്ന് ചിത്രങ്ങള്‍ എടുക്കാനും മഞ്ഞയോടുള്ള ഇഷ്ടത്തെക്കുറിച്ച് കൗതുകത്തോടെ ചോദിച്ചറിയാനും തുടങ്ങി. ഇപ്പോള്‍ ആളുകള്‍ക്കിടയില്‍ വെറൈറ്റി താരമാണ് അബു സാകൗര്‍.
