കൊച്ചി: മലയാളത്തിന്റെ പ്രിയ നടൻ മോഹൻലാലിന് പിറന്നാൾ ആശംസകളുമായി സിനിമാ ലോകം. നടനും സംവിധായകനുമായ പൃഥ്വിരാജിന്റെ ആശംസയാണിപ്പോൾ സിനിമാസ്വാദകരെ ആവേശത്തിലാക്കിയിരിക്കുന്നത്. ‘ഹാപ്പി ബർത്ത്ഡേ അബ്രാം, ഹാപ്പി ബർത്ത്ഡേ സ്റ്റീഫൻ, ഹാപ്പി ബർത്ത്ഡേ ലാലേട്ടാ’ എന്നു പറഞ്ഞാണ് പൃഥ്വി മോഹൻലാലിന് ആശംസകൾ നേർന്നത്. ലൂസിഫർ സിനിമയുടെ ഷൂട്ടിങ്ങിന്റെ ആദ്യ ദിനത്തിലെടുത്ത ഒരു ചിത്രം പങ്കു വച്ചാണ് താരത്തിന്റെ ആശംസ.
ഈ ചിത്രം ലൂസിഫറിന്റെ ആദ്യ ദിനത്തിലെടുത്തതാണ്. ഈ മഹാമാരി വന്നില്ലായിരുന്നുവെങ്കിൽ നാം ഇപ്പോൾ എമ്പുരാൻ ഷൂട്ട് ചെയ്യുകയായിരുന്നേനെ. ഉടനെ തന്നെ അത് ആരംഭിക്കാൻ സാധിക്കുമെന്ന് നമുക്ക് പ്രതീക്ഷിക്കാം. ഹാപ്പി ബർത്ത്ഡേ അബ്രാം, ഹാപ്പി ബർത്ത്ഡേ സ്റ്റീഫൻ, ഹാപ്പി ബർത്ത്ഡേ ലാലേട്ടാ’ പൃഥ്വി കുറിച്ചു.
നിരവധി പേരാണ് സിനിമാ മേഖലയിൽ നിന്നും മോഹൻലാലിന് ആശംസകളുമായി എത്തിയത്. കൃത്യം 12 മണിയ്ക്ക് തന്നെ ആശംസയുമായി മമ്മൂട്ടിയെത്തി. ആത്മസുഹൃത്തും സംവിധായകനുമായ പ്രിയദർശൻ, ആസിഫ് അലി, സംയുക്ത, നിവിൻ പോളി, ടൊവിനോ തോമസ്, ജയറാം, തുടങ്ങി മലയാള സിനിമയൊന്നാകെ തങ്ങളുടെ ലാലേട്ടന് ജന്മദിനാശംസകൾ നേരുകയാണ്. സോഷ്യൽ മീഡിയയിലെങ്ങും മോഹൻലാലിന്റെ പിറന്നാൾ വീഡിയോകളാണ്.
This was Day 1 of Lucifer shoot. If not for the pandemic, we should have been shooting Empuraan by now. Will hopefully…
Posted by Prithviraj Sukumaran on Thursday, May 20, 2021
