ന്യൂഡൽഹി : രാജ്യത്ത് കൊറോണ പ്രതിരോധ വാക്‌സിൻ സ്വീകരിച്ചയാളുകളെ ബാഹുബലിയെന്ന് വിശേഷിപ്പിച്ച് പ്രധാനമന്ത്രി നരേന്ദ്ര മോദി. പാർലമെന്റ് വർഷകാല സമ്മേളനത്തിന്റെ ഭാഗമായി മാദ്ധ്യമങ്ങളോട് സംസാരിക്കുന്നതിനിടെയായിരുന്നു അദ്ദേഹത്തിന്റെ വിശേഷണം. രാജ്യത്ത് 40 കോടി ജനങ്ങൾ പ്രതിരോധ വാക്‌സിൻ സ്വീകരിച്ചെന്നും പ്രധാനമന്ത്രി മാദ്ധ്യമങ്ങളോട് പറഞ്ഞു.
നിങ്ങൾക്കെല്ലാവർക്കും വാക്‌സിന്റെ ആദ്യ ഡോസ് ലഭിച്ചുകാണുമെന്ന് പ്രതീക്ഷിക്കുന്നവെന്ന് പറഞ്ഞാണ് പ്രധാനമന്ത്രി സംസാരിക്കാൻ ആരംഭിച്ചത്. കൊറോണ പ്രതിരോധ വാക്‌സിൻ നൽകുക കൈകളിൽ (ബാഹു) ആണ്. അതുകൊണ്ടു തന്നെ വാക്‌സിൻ എടുത്ത എല്ലാവരും കൈകൾക്ക് കരുത്തുള്ള ബാഹുബലികളാണ്. വാക്‌സിൻ സ്വീകരിച്ച 40 കോടി ജനങ്ങൾ കൊറോണയ്‌ക്കെതിരെ പോരാടുന്ന ബാഹുബലികളായി മാറി. കൊറോണ വ്യാപനം ലോകത്തെ പിടിച്ചു കുലുക്കിയിരിക്കുകയാണ്. അതിനാൽ പാർലമെന്റിൽ സമഗ്രമായ ചർച്ച ആവശ്യമാണെന്നും പ്രധാനമന്ത്രി പറഞ്ഞു.
പാർലമെന്റിൽ അച്ചടക്കത്തോടെയുള്ള ചർച്ചകളും പെരുമാറ്റവുമാണ് കേന്ദ്രസർക്കാർ ആഗ്രഹിക്കുന്നത്. എല്ലാ അംഗങ്ങളോടും സഭയിൽ ശക്തമായ ചോദ്യങ്ങൾ ചോദിക്കാനാണ് ആവശ്യപ്പെടുന്നത്. എന്നാൽ ചോദ്യങ്ങളോട് പ്രതികരിക്കാൻ കൂടി സർക്കാരിനെ അനുവദിക്കണം. ഇത് ജനാധിപത്യത്തെ പരിപോഷിപ്പിക്കും. ജനങ്ങൾക്ക് ജനാധിപത്യത്തോടുള്ള വിശ്വാസം കൂടുതൽ ശക്തമാകുമെന്നും മോദി അഭിപ്രായപ്പെട്ടു.
Comments