രാമായണ മാസം പുണ്യമാസമായി കണക്കാക്കുന്നു. കര്ക്കിടകമാസത്തിലെ ക്ഷേത്രദര്ശനം വിശ്വാസികള്ക്ക് ഏറെ പ്രധാനമാണ്. രാമായണ മാസത്തില് ഭക്തര് കൂടുതലായി എത്തുന്ന ക്ഷേത്രമാണ് തിരുമറയൂര് ക്ഷേത്രം. നിരവധി വിശ്വാസങ്ങളാല് സമൃദ്ധമായ ക്ഷേത്രമാണ് തിരുമറയൂര് ക്ഷേത്രം.
800 വര്ഷത്തിലധികം പഴക്കമുള്ള ഈ ക്ഷേത്രം എറണാകുളം ജില്ലയില് പിറവം പേപ്പതിക്കു സമീപമാണ് സ്ഥിതി ചെയ്യുന്നത്. ശ്രീരാമനാണ് പ്രധാന പ്രതിഷ്ഠ. ശ്രീരാമന്റെ പട്ടാഭിഷേക രൂപത്തിൽ പ്രതിഷ്ഠയുടെ ഭാവമുള്ളതിനാല് രാമനൊപ്പം സഹോദരന്മാരായ ലക്ഷ്മണന്റെയും ഭരതന്റെയും ശത്രുഘ്നന്റെയും ഒപ്പം സീതാദേവിയുടെയും സാന്നിധ്യം ക്ഷേത്രത്തിലുണ്ട് എന്നാണ് വിശ്വസിക്കുന്നത്.
ലോകത്തിലെ ഏക ഹനുമത് പൂജിത ശ്രീരാമസ്വാമി ക്ഷേത്രമാണ് ഇതെന്നാണ് വിശ്വാസം. ഹനുമാന്റെ സാന്നിധ്യം എല്ലാ ദിവസവും ഇവിടെ ഉണ്ടാകുമെന്നാണ് വിശ്വാസികള് പറയുന്നത്. എല്ലാ ദിവസവും പുലര്ച്ചെ 3.30 ന് ഹനുമാന് ശ്രീരാമന് പൂജ ചെയ്യുവാനായി ക്ഷേത്ര സന്നിധിയില് എത്താറുണ്ടെന്നാണ് വിശ്വാസം.
അതിനു തെളിവായി പലരും പിറ്റേന്ന് പുലര്ച്ചെ പൂജയുടെ ഭാഗമായ പൂക്കളും തുളസിയുമെല്ലാം ഇവിടെ കാണാറുണ്ടെന്നാണ് പറയുന്നത്. രാമായണത്തിലെ പലസംഭവങ്ങള്ക്കും സാക്ഷിയായ പ്രദേശമാണിതെന്ന് വിശ്വസിക്കപ്പെടുന്നു. വനവാസക്കാലത്ത് രാമന് സീതയോടും ലക്ഷ്മണനോടും ഒപ്പം ഇതുവഴി യാത്ര ചെയ്തു പോയിരുന്നുവെന്നും, ഇവിടെ വെച്ചുതന്നെയാണ് മാരീചന് മാനിന്റെ രൂപത്തിലെത്തിയതും അതിന്റെ രാമന് അമ്പെയ്തു വീഴ്ത്തിയതെന്നും, മറഞ്ഞിരുന്ന് അമ്പെയ്ത ഇടമായതിനാലാണ് പ്രദേശത്തിന് തിരുമറയൂര് എന്ന പേരു വന്നതെന്നും പറയപ്പെടുന്നു.
