പ്രസിദ്ധമായ നൂറ്റിയെട്ട് ദുര്ഗാലയങ്ങളില് ഒന്നാണ് ചെറുകുന്ന് അന്നപൂര്ണേശ്വരി ക്ഷേത്രം. കണ്ണൂര് ജില്ലയിലെ ചെറുകുന്ന് പഞ്ചായത്തിലാണ് അതിപുരാതനമായ ഈ ക്ഷേത്രം സ്ഥിതി മഹാവിഷ്ണുവാണ് ഇവിടത്തെ പ്രധാനപ്രതിഷ്ഠ. എങ്കിലും പ്രാധാന്യം അന്നപൂര്ണേശ്വരി ദേവിക്കാണ്. വെട്ടുകല്ലുകൊണ്ടുള്ള ക്ഷേത്രനിര്മാണവും ദാരുശില്പ്പങ്ങളും ആരെയും ആകര്ഷിക്കും. നാലമ്പലത്തിനകത്ത് ചുറ്റമ്പലം, അതിനുപുറമെ മറ്റൊരു ചുറ്റമ്പലം, അഗ്രശാലയോട് ചേര്ന്ന് വലിയ അടുക്കള തുടങ്ങി
നിരവധി കാഴ്ചകളാല് സമ്പന്നമാണ് ക്ഷേത്രം.
ആദ്യം ശ്രീകൃഷ്ണന്റേതും അതേ ദിശയില് അന്നപൂര്ണേശ്വരിയുടേതുമായി ഒറ്റ നാലമ്പലത്തിനകത്ത് രണ്ടു ക്ഷേത്രങ്ങളാണ് ഇവിടെയുളളത്. ഉപദേവന്മാരില്ലെങ്കിലും ശിവസാന്നിധ്യമുണ്ട്. അന്നപൂര്ണേശ്വരി ക്ഷേത്രത്തിലെ നെയ്യമൃത് സമര്പ്പണം പ്രസിദ്ധമാണ്. അത്താഴപൂജ കഴിഞ്ഞാണിത്. നെയ്യമൃത് എന്നാല് ഇവിടെ രണ്ടുപാത്രമാണ്. ശിവപാര്വ്വതീ സങ്കല്പ്പമുള്ളതുകൊണ്ടാണിങ്ങനെ. ഈ സമയത്ത് തളിപ്പറമ്പ് ദേവന് ഇവിടെ എത്തുമെന്നാണ് വിശ്വാസം. തളിപ്പറമ്പില് നെയ്യമൃതാണ് വഴിപാട്. നെയ്യമൃത് കൊണ്ട് ഭക്തജനങ്ങള്ക്കുണ്ടാകുന്ന ഗുണമാണ് ഇത്രയും പ്രാധാന്യമുണ്ടാകാന് കാരണമെന്നാണ് പറയപ്പെടുന്നത്.
ക്ഷേത്രത്തിലെ പ്രധാന വഴിപാട് അന്നദാനമാണ്. രണ്ടുനേരം പ്രസാദമൂട്ടുണ്ട്. നിത്യവും ഉച്ചയ്ക്കും രാത്രിയിലും ഭക്ഷണം വിളമ്പാനുള്ള ഇല കൊണ്ടുവരുന്നതിന് അവകാശികളായ വീട്ടുകാര് ഉണ്ട്. ഇലക്കല് വീട്ടുകാര് എന്നാണ് അവരെ അറിയപ്പെടുക. ഇല വെട്ടാന് പോകുന്നവരെ ക്ഷേത്രത്തിലെ ആല്ത്തറയില് നിന്ന് വിളിക്കുന്ന ചടങ്ങുമുണ്ട്. ഭാരതത്തിലെ വളരെ പ്രസിദ്ധമായ അപൂര്വ്വം അന്നപൂര്ണ്ണേശ്വരി ക്ഷേത്രങ്ങളില് ഒന്നാണിത്.
